A chung berah Bagnaia awm leh ta

Indonesia Grand Prix tlan zawh takah Francesco Bagnaia a chak ber a, Italian tlangval hian nimina hnehna a chan avang hian MotoGP rider championsip hmahruaitu nihna a luah leh nghal.

Inrinni khan Sprint Race an nei a, hemi ṭuma chak ber Jorge Martin chu table chung berah a awm zuai. Mahse, nimina intlansiak tak an neihnaah Bagnaia chu a chak ber a, point 346 hmuin a chung berah a awm leh ta a ni.

Indonesia Grand Prix-ah hian Martin erawh a vanduai, lap 14-na an tlan laiin hma hruai mek mah se a chesual a, inelna hmachhawn zo ve thei loin point an hmuh belh ta lo, a elpui Bagnaia erawh 13-na aṭangin bul ṭan mah se tun season chhunga a vawi ruk nan a chak.

Kum 26 mi Bagnaia chuan, "Martin kha a tlan chak êm êm a, a tlan lai kha hmuh khan fimkhur a ngai hle tih ka hre thei. Keimah leh keimah kha fimkhur turin ka inchah mawlh mawlh a, rider chesual tam tak kara ka tlan tluan ve thei kha ka lawm takzet," a ti.

Khua a lumin boruak a hnawng hle a, rider intlansiak 21 zinga 14 chauhin inelna an tlan tluan thei. Chesual zingah hian MotoGP vawi ruk champion tawh Marc Marquez pawh a tel, intlansiak pangngai bakah hian sprint race lamah pawh a chesual bawk.

Marquez hian tun season tawp rualin Repsol Honda a chhuahsan dawn tih a sawi chiang tawh a, season thar aṭang chuan chona thar hmachhawn turin Gresini Racing a zawm ang, a team awm mekna nena contract an neih lai chu inhriatthiam tawnnain an titawp a ni.

Bike intlansiakna sang ber hi season chawhnu lam an hmang chho mek. October 22, Pathianni chawhma dar 8:30 hian Australian Grand Prix an tlan leh ang.