Brazil leh Neymar an lawm lo

South Amercian ramten World Cup qualifier an khelh laiah Brazil leh Venezuela an inhnehtawk ṭumin, forward Neymar chu khelmual a chhuahsan tur chu puakzo (popcorn) hlawmin an lo vawm.

Neymar hi a luah vawm fuh a ni a, hliam leh natna tur chi ni lo mah se inzah lohna niah a ngai. Brazil tana goal khung tam ber Neymar chuan, "Engin nge min rawn vawm tak pawh kha ka hre lo.

"Mahse, min rawn fuh tak avangin ka lawm lo hle. Hetianga midang tihnat leh tihbuai duh rilru pu mi an awm ṭhin hi a pawi ka ti a, mihring kan nihna leh football tan pawh a ṭha lo.

"Lehkhathiam leh mi fing tak thil tih chu a ni lo ang tih a chiang reng. Hetiang thil a tawp theih nan chuan kan faten zirtirna ṭha an dawn a ngai," tiin a sawi.

Brazil coach Fernando Diniz pawhin Al Hilal forward laka thil thleng hi pawi a ti a, match khelh hmabak an la neih hoah chuan harsatna leh buaina siamtu awm tawh lo se a duh thu a sawi ve bawk.

Brazil hi Venezuela nen an inhnehtawk avangin Argentina hnuaiah an awm mek. October 18, Nilaini zing dar 5:30 hian Uruguay an lenchilh leh ang.