Nagelsmann-a'n Germany a chakpui nghal

Bayern Munich coach hlui Julian Nagelsmann hnuaia an match hmasa berah Germany an chak nghal a, friendly match-ah USA chu 3-1 in an hneh.

Inrinni zan inkhelah USA-in bul an ṭan ṭha zawk a, mualneitu team tan Christian Pulisic chuan minute 27-na lekah goal hmahruai a khung - mahse, German team hian first half chhungin Ilkay Gundogan hmangin si phurh an sut.

Second half-ah Niclas Fullkrug leh Jamal Musiala ten goal khat ve ve an khung leh a, mikhualna ramah 3-1 in Germany an chak. Euro 2024 an thlen dawn avanga qualifier khelh ngai ve lo Germany hian Nilaini zing dar 5:30-ah Mexico nen friendly match an khel zui leh ang.

Germany hian September khan 4-1 ngawta Japan an ngam loh hnuah coach Hansi Flick an ban a, a hmun ruak luah turin Nagelsmann an sawm lut - kum 36 mi coach hi July 2024 thleng an hnena cham turin contract an pe.