India-in Olympic thlen a beisei

India prime minister Narendra Modi chuan 2036 Olympic Games thlen chu thil châkawm tak a nih thu a sawi a, khawvel infiamna khawmpui lian hi thlen theih an inbeisei thu a sawi bawk.

Tun hmain India hian Olympic hi a la thleng ngai lo, kum 2010 Commonwealth Games erawh kha chu Delhi khawpuiah a lo thleng tawh a ni. Olympic-ah chuan infiamna peng hrang an tam a, khawvel huap a nih avangin hmunhma neih ṭhat a ngai hle.

Narendra Modi chuan, "Olympic 2036 thlen hi duhthusam a ni a, kan suangtuahna leh duhthusam te hi International Olympic Committee (IOC) nena ṭha taka thawkho chungin a tihhlawhtlin theih a rinawm.

"Infiamna hi chu medal lak ringawt a ni lo a, thinlung a tel a ni," a ti. Modi-a hian Olympic 2036 bakah hian Youth Olympic 2029 pawh India chuan thlen theih a beisei tih a sawi bawk.

Olympic 2036 thleng tur hi thlan a la ni lo. Mexico leh Indonesia te chuan thlen an duh thu an sawi chiang tawh a, kumin September thla khan Poland president Andrzej Duda pawhin a lo sawi tawh - tunah India chuan thawm a rawn nei ve leh ta a ni.

Paris khawpui chuan Olympic 2024 a thleng dawn a, chumi hnuah Los Angeles chuan Olympic 2028 thlengin kum 2032 chu Brisbane-ah nghah a ni dawn tih a chiang tawh a, ruahmanna kalpui vek tawh a ni.