Covid-19 lakah fihlîm zel

Zoram Medical Col­lege (ZMC) Covid-19 Labo­ratory-ah May 23, Inrinni khan mi 12-te swab sample endik a ni a, Covid-19 hripui an vei lo vek. Nimin Pathianni khan mi paruk sample endik leh a ni a, he thu ziah lai hian result kan hre hman lo.

ZMC-SRH Covid-19 Bulletin tarlan danin, Inrinnia swab sample endikte chu State Referral Hospital (SRH)-a damlo enkawl mek pathum leh damdawi-ina thawk mi pakua an ni. Nimina sample endikte chu rinhlelh mi pahnih leh anmahni buaipuitu mi pathum an ni a; damlo pahnihte chu quarantine facility leh Ebenezer Hospital aṭanga hruai an ni.

SRH-ah hian Inrinni khan rinhlelh thilah mi pahnih dah luh an ni a, nimin khan damlo pahnih leh anmahni buaipuitu pahnihte dah luh leh a ni bawk. Nimin tlai dar 5 thlenga dinhmunah chuan, SRH-ah hian mi 11 an awm mek a, Risk Ward-ah mi panga, Make Shift ICU/SARI Ward-ah mi pakhat leh Holding Ward-ah mi panga dah an ni.