Liverpool chak zo lo; Spurs leh Everton an kal zel

Inrinni zan Premier League inkhelah Liver-pool an mualpho a, an khelmualah table mawng lama awm Sunderland nen goal hnih ve ve khungin an inhnehtawk.

Tottenham Hotspur-in hmalam an pan zel a, Premier League table-a pahnihna dinhmun luah turin Watford chu 1-0 in an hneh. Champions League mai niloin champion hial an sawi ri ngam ta.

Everton chuan khual-mualah Stoke City chu 3-0 in an hneh bawk a, an match hnuhnung pathumah a zawnin goal thum an khung a, an lamah an chhuah miah lo thung.

Klopp tel loin

Liverpool manager Jurgen Klopp-a'n a rilphir paih a nih dawn avangin a naute a ho thei lo a, damdawi in lamah a hun a hmang. Inrinni zana Liverpool result-ah Klopp a tan lawmna tur a awm lo a, German manager tan damna tur a awm lo.

Ṭum danga an buainaah tho Reds an talbuai a, 2-0 a hma an hruai zet hnuah goal hnih an chhuah leh a, draw result an hlawh chhuak. Liverpool-in an chak lohnaah dem tur an zawng dawn a nih chuan an tlarhnungte dem tur an ni ang.

Liverpool tan Roberto Firmino-a'n James Milner-a ball pek fing tak hmanga hmahruaina goal a khung hnuah Adam Lallana khung tur a siamsak leh a, awlsam taka chak tur angin Reds an lang hman.

Mahse, Liverpool keeper Simon Mignolet-a'n holam takin Adam Johnson-a freekick a chhuah a, Kolo Toure-a'n Jermain Defoe a dan hneh loh avangin English striker hian an si phurh sut zawhna goal a khung bawk.

Liverpool-in kum 2016-a Anfield-a inkhel an hmachhawnah chak hmel an la hmu lo a, an match hnuhnung parukah goal 14 lai an chhuah tawh.

Reds buaina

Tun hnaiah Liverpool neituten an stand siam thara ticket man chu £77 a nih thu an puang a, Liverpool fan-te'n hei hi to uchuaka ngaiin an duh lohna an lantir. Sunderland an mikhualna inkhelah minute 77-naah fans sing chuangin stadium an chhuahsan.

Liverpool fan-te kal chhuah hmain Reds-in 2-0 in hma an hruai a, minute 80 hnuah goal hnih an chhuah avangin fan-te chet danin player-te rilru a luah niin a lang.

Klopp-a aiawha team kaihruaitu First-team coach Pepijn Lijnders chuan, "Khawvela fans ṭha ber kan nei a, an duh loh zawng aupui turin dikna chanvo an nei a ni. Stadium boruak an ti danglam tih ka pawm a, kan inkhel result erawh a danglam phah lo," tiin fan-te vanga chak lo an nih loh thu a sawi.

Hmalam panin Spurs

Tottenham Hotspur-in 1-0 a Watford an hnehna inkhelah player langsar ngai lo a langsar a, defender Kieran Trippier chuan Spurs tana a goal khung hmasak ber khungin a team a chakpui. Burnley defender hlui goal khung hi Dele Alli siamsak a ni.

Spurs-in inkhel an thunun tluan a, goal-ah vawi 26 zet pet mah se a dan pangngaiin Watford goalkeeper Heurelho Gomes a khel ṭha a, Tottenham keeper hlui hian vawi tam a club hlui hi a ti beidawng. Mahse, keeper chet ṭhat ringawtin Watford a chhanhim zo lo a, an tlarhmaten goal-ah an pet miah lo bawk.

Tottenham boss Mauri-cio Pochettino chuan, "Ka player-te ka chhuang takzet a ni. Rilru hahdam taka kan awm a ṭul a, table-ah pahnihna dinhmun luah mah ila season ṭan tir
aṭanga kan thupui chu step by step-a kal hi a ni. Squad naupang tak kan ni a, zawi zawiin hmalam kan pan zel ang," tiin an result vanga pressure sang tak neih a duh lo.

Everton chak chiang

Stoke City khelmualah Everton an tlangnel a, Romelu Lukaku-a'n penalty aṭanga goal hmahruai a khung hnuah an inkhelh zana an nuin nau a hrin sak Seamus Coleman chuan goal hmangin a fanu thar neih a lawm a, Aaron Lennon chuan goal khat dang khung ve lehin 3-0 in an chak.

Everton manager Roberto Martinez chuan, "Tlarhnung lamah kan khel ṭha a, kan tlarhmaten hun ṭha vawi tam an nei bawk. Kan vanneih zan chu nise goal thum emaw goal li khung thei kan ni. Tuna pawimawh ber chu kan theihna anga khelh chhuah zel hi a ni," tiin a naute a fuih nghal.

Inrinni zan Premier League Inkhel Results

Manchester City 1 - 3 Leicester City

Swansea City 1 - 1 Crystal Palace

Stoke City 0 - 3 Everton

Aston Villa 2 - 0 Norwich City

Liverpool 2 - 2 Sunderland

Tottenham Hotspur 1 - 0 Watford

Newcastle United 1 - 0 West Bromwich

Southampton 1 - 0 West Ham United