China-in thawm an nei zel

Chinese Super League-in football khawvelah thawm an neih belh zel a, Jose Mourinho, Ezequiel Lavezzi leh Loic Remy-te chu Chinese club-te nen sawizawm an ni leh ta.

Chelsea winger hlui Gael Kakuta chuan Sevilla aṭangin Hebei China Fortune a zawm ve leh bawk. Gervinho la lut tawhtu club hian French midfielder manah hian pound maktaduai 4.6 an theh chhuak a, Chelsea striker Loic Remy nen sawi zawm mek an ni bawk.

Blues-in season tawp ruala lakluh an tum anga an sawi Paris St. Germain midfielder Lavezzi chu Shanghai Shenua nen sawi zawm an ni a, Argentina international hian kum khatah euro maktaduai 10 a hlawh dawn niin khawthlang media-te chuan an tarlang hial tawh.

Tun hnaiah Watford striker Odion Ighalo chuan kar khata pound £300,000 hlawh turin China aṭanga sawmtu a neih thu a sawi chhuak tawh a, Chinese club an hming tarlan loh chuan Oscar-a manah euro maktaduai 75 leh Zenit Saint Petersburg winger Hulk manah euro maktaduai 90 thehchhuah an huama sawi a ni bawk.

Blues manager Guus Hiddink chuan, "China hian tun hnaiah football an ngaih thutak zia an tilang tawh a, Stamford Bridge ka pan hma khan kei ngei pawhin sawmtu ka nei a ni. China hian khawvela footballer ṭha ber ber leh coach ṭha tak tak lakluh zel an duh a ni," tiin tun hnaia China sum sen tam chhan a sawi.