USA-ah Ashley Cole-a'n tih mai mai a tum lo

January transfer-a LA Galaxy zawmtu Ashley Cole chuan Major League Soccer chu chawl hahdam tura a pan loh thu sawiin a theihtawp a chhuah tur thu a sawi.

Roma aṭanga LA Galaxy pantu defender hian Chelsea aṭanga Italian club a zawm hma hian MLS club aṭanga sawmna a hmuh chu lo hnar tawhin, "Chawl hahdam thei ka ni lo," tiin a lo sawi tawh.

MLS club tana khel tur Cole chuan, "Thiamthu sawi turin ka lokal lo, kha thu kha ka sawi ngei a, mahse a ni lo zawngin an kuai her a ni. Club thar Roma ka zawm a, kan fan-te hnenah theihtawp ka chhuah tur thu kha ka sawi a ngai a ni," tiin a
ṭawngkam chu Roma fan-te tih lawm a tumna a nih thu a sawi.

LA Galaxy-ah hian Steven Gerrard leh Robbie Keane-te an awm sa a, Premier League lama a khingpui ni ṭhin player-te nen hian Cole hi an khel ho dawn a ni.

English defender chuan, "Stevie G, Lam-pard leh Keano-te USA-ah hian an lo awm sa tawh avangin ka rawn hmasa a, manager hnenah he rama in inkhelh dan chungchang ka zawt bawk. A harsa dawn tih ka hria a, mahse ka theihtawp ka chhuah ang," tiin a club thar tan theihtawp a chhuah tur thu a sawi.