I League Under 18 AIFF Academy-in Aizawl FC hnehin final lut

AIFF Elite Academy-in nimin khan V. Lalengzama goal hnih leh Lalṭhakima own goal hmangin Aizawl FC 3-0 in an hneh a, I League Under 18 final an lut. Champion lai AIFF Academy hian final-ah TATA Football Academy an hmachhawn ang a, Aizawl FC-in pathumna inchuhnaah Salgaocar an hmachhawn thung ang.

Mizo an hmingṭha

AIFF Academy-ah Mizo pathum Edmund Lalrindika, Jerry Lalrinzuala leh V. Lalengzama te'n starting eleven an chang a, an hmachhawn Aizawl FC Academy hi Mizo hlang awmna a ni.

Howrah Stadium-ah Aizawl FC-in bul an ṭan ṭha lo a, minute 4-na lekah Lunglei rawlthar V. Lalengzama'n AIFF Academy goal hmahruai a khung. Goal chhuah hma avangin Aizawl FC an talbuai a, an insiamṭhat theih lawk loh avangin Engzama'n minute 25-naah box pawn aṭangin goal hnihna a pet lut leh bawk.

Minute 29-naah ding lam aṭanga Prosenjit Chakroborty cross chu Aizawl FC defender Ṭhakima'n tauh sualin an lamah an lut a, darkar chanve chhung lekin AIFF Academy-in goal thum an khung a, chak tur a chiang der tawh.

Aizawl FC-in goal thum an chhuah hnuah an insiamṭha a, mah se chak tur khawp chuan an insiamrem lo. Second half-ah goal a luh belh tawh lo a, AIFF Academy 3-0 in an chak.

Thlen chin?

Aizawl FC-in final lut zo lo mah se an thlen chin erawh a sang hle. Final round thlen ringawt pawh hi hlawhtlinna a ni. India ram club ṭha Mohun Bagan, Shillong Lajong, Sporting Goa, Dempo leh Bengaluru Under 18 team-te'n final round an thleng zo lo.

Final round zawhah semifinal a la awm leh a, a sang pali zingah India ram academy zinga hmun hma nei ṭha ber DSK Shivajians Liverpool Academy meuh pawh an tel pha lo.

Eng nge an sawi?

AIFF Academy coach Floyd Pinto chuan, "Game ṭha tak kan khel thei a, ka lawm khawp mai. Tunah chuan Nilainia final kan khelh tur chauh kan ngaihtuah a ṭul a ni," tiin a sawi.

Aizawl FC coach Nicky Malsawmtluanga chuan, "Khelh ṭhat leh chu a châkawm khawp mai, second half-ah kan insiam rem viau a, mah se nidanga kan game kan pha lo. Kan ṭang ulh deuh nge India team an nih avangin kan buai deuh tih pawh ka hre chiah lo. Keini aiin an fitness a ṭha zawk a, min hnaih chilh zung zung a, kan tan khelh a harsa a ni," tiin an khelh ṭhat tawk loh thu a sawi.

Nicky chuan lawmthu sawi zuiin, "Aizawl FC ṭantute chungah kan lawm a, kawng engkima min phur puitu kan president chungah kan lawm takzet bawk. Pathumna kan la inchuh dawn a, IFA Shield Under 19 tournament kan khel dawn bawk a, theihtawp kan chhuah zel ang," tiin Vanglaini palai a hrilh.