Zanin dar 3:30-ah nipui transfer tawp dawn

Nipui transfer bazar chu zanin hian a tawp dawn. Premier League, La Liga leh Ligue 1 club tana transfer hun chu zanin/naktuk zing dar 3:30-ah a zo ang a, hemi hma hian Bundesliga (9:30 PM) leh Serie A (11:30 PM) transfer hun a tawp ang.

Premier League leh EFL club tan October 16 thleng 'domestic-only window' hawn a ni dawn. Hetah hian Premier League club pahnih inkarah transfer a awm thei lo a, chutihrualin Premier League leh EFL club inkarah erawh transfer a awm thei thung ang.

Covid-19 vangin transfer kalphung a dang hret mah se hripui hian transfer a ti ngaihnawm zawk ang hialin a ngaih theih. Club tam takin sum inren vangin chhawr loh tur player hralh chhuah dan an zawng a, ṭum dang ang thoin nipui transfer a lun hle.

Jadon Sancho (Borussia Dortmund): Kum 20 mi Sancho hi Manchester United-in an lak duh ber a ni a, English club-in pound maktaduai 91.3-in dawr tawh mah se Borussia Dortmund hian an hnawl niin an sawi. German club hian pound maktaduai 100 chuang an chhiar a, tawlh sawn an tum loh bakah Sancho thlakna tur player dang lakna hun a awm tawh loh avangin United-in an ngamna zat hi ti pung mah se Dortmund hian an phal tawh kher lo ang.

Ousmane Dembele (Barcelona): Man United-in Sancho an la thei lo a nih chuan loan hmangin Ousmane Dembele lak an tum nia sawi a ni a, hun erawh a tlem ta hle. Spanish club hian loan ni loin Dembele hi hralh chhuah an duh a, pound maktaduai 60-in an phal niin sawi a awm. Ole Gunnar Solskjaer hote hi Sevilla winger Lucas Ocampos nen pawh sawi zawm a ni a, zaninah engkim a chiang ang.

United hian mual sira khel tur player hi an lalut thei a nih chuan Daniel James a chhuah a rinawm. Welsh winger hi Leeds United manager Marcelo Bielsa-a'n squad tih chhah nan a duh.

Houssem Aouar (Lyon): Lyon midfielder Houssem Aouar hi Arsenal, PSG leh Juventus te nen an sawi zawm. Gunners hian Auoar lak an tumna zat leh Lyon phutna zat a inthlau deuh a, France Under-21 international hi Emirates Stadium-ah hmuh a beiseiawm ta lo. Gunners hi midfield tih chak an mamawh a, Chelsea midfielder Jorginho hming thlengin an sawi ri. Chutihrualin Mesut Ozil-a contract hi June 2021-ah a tawp dawn a, tun transfer-ah pawh chhuak thei dinhmunah a ding.

Antonio Rudiger (Chelsea): Frank Lampard-a'n Germany international Antonio Rudiger a ring zo tawh lo a, khelhna hmun chang turin London club a chhuah a ngai. Tottenham-in tlarhnung thuam ṭhat an mamawh a, Rudiger hi Jose Mourinho mamawh tak a ni thei ang.

Chelsea hian player an lakluh hnem avangin Ross Barkley chu loan hmangin Aston Villa-ah an chhuahtir tawh a, Ruben Loftus-Cheek pawh chhuah thei dinhmunah a ding. English midfielder hi West Ham, Southampton leh Aston Villa ten an duh vek ang.

Declan Rice (West Ham United): Chelsea-in pound maktaduai 220 an hmang tling tawh mah se an duh khawp an la hmu lo. West Ham midfielder Declan Rice lakluh tumin Blues-in hma an la a, amaherawhchu English midfielder hi Hammers-ah a hlim. Lampard-a'n midfield ti chak tura Rice lakluh a duh a nih chuan sum a mamawh dawn a, Roman Abramovich-a puihna a mamawh ang.