Atletico tan Torres-a goal 100-na

Fernando Torres chuan Inrinni zan khan Atletico Madrid tana a goal 100-na a khung a, amah siam liantu club hi an mikhual Eibar lakah 3-1 in hnehna a chanpui.

Liverpool striker hlui hian Atletico tana a khelh hmasak zawk laiin match 244 a inlanah goal 91 a lo khung tawh a, Anfield lam a pan san. Reds tan hlawhtling viau mah se Chelsea-ah besei a phak lo a, AC Milan a zawm hnuah a club hlui Atletico lamah hian loan-a kir lehin a goal 100-na hi a khung ta a ni.

Atletico Madrid khelmuala inkhelah hian beisei loh zawk Eibar-in Keko hmangin goal hmahruai khung mah se Atletico Madrid-in second half-ah Jose Gimenez leh Saul hmangin an chhanglet ve lehnghal a, Torres chuan minute 91-naah Luciano Vietto ball siamsak chu hnai set sawt aṭangin a pet goal ve leh bawk. Spain international striker hian Atletico tana goal 100 khung tur hian match 295 khelmual chhungah a inlan.

Torres a lawm

Atletico tana a goal 100-na khungtu Torres chuan, "He club tana goal 100 ka khung thei hi ka lawm a, club tana goal khungtu ropui tak tak zinga ka hming a chuang ve ta hi ka inchhuang hle a ni," a ti.

Torres chuan La Liga no-mawi chawi beiseina an la neih zel thu sawiin, "Match ṭhenkhata hnehna kan chan loh hnuah kan tho leh ta a ni tih kan lantir a, zanina kan chakna hian La Liga-ah beiseina kan la nei ve zel tih a tarlang a ni," tiin league nomawi an chawi theih a la inbeisei.

Atletico Madrid hi table chung bera awm Barcelona nen khelh hniha khel tam zawk chungin La Liga-ah hma an hruai dun a, Catalan club hian nizan khan Levante an hmachhawn thung.

Simeone-a lawmna

Atletico Madrid coach Diego Simeone chuan Vicente Calderon-a pungkhawm an fan-te hnenah lawmthu a sawi a, Eibar an hnehna inkhelah fan-te'n an thawhhlawk thu sawiin a lawm hle.

Argentine manager rorum chuan, "Sawi tam ngai loin kan fan-te hian hna ropui tak an lo thawk tawh ṭhin a, zaninah khan an ropui lehzual a ni. First half-ah kan khelh chhiat avangin kan talbuai
ṭhelh a, mahse fan-te min auh phurna leh theihtawp an chhuahna khan phurna min pe a ni," tiin second half-a an din chhuah leh chhan chu fan-te vang a nih thu a sawi.

Simeone chuan a player-te fak nghalin, "Second half-a kan khelh dan khan he team theihna hi chiang takin a pholang a, kan ṭhat tawkzia a tilang a ni," a ti.

Player a nih laia Atletico tan pawha lo khel tawh Simeone tan Eibar an hnehna inkhel hi coach a nih hnua league match 159-a vawi 100 chak hmel a hmuhna a ni bawk.