Bundesliga Bayern Munich leh Dortmund ten goal an khung lo

Bundesliga season kal meka roreltu club lian pahnih Bayern Munich leh Borussia Dortmund ten Inrinni zan khan goal an khung lo ve ve a, table-a an in-thlauhna chu point riat a ni chhunzawm zel.

Bayern an chelh

Bayer Leverkusen khelmual BayArena-ah hian Bayern Mu-nich-in result ṭha an hlawh chhuak khat hle a, inelna hrang hrangah kum 2013 March thlaa 2-1 a hnehna an chan bak an la hlawhtling leh lo a, Inrinni zan pawh hian point khatah an lungawi a ṭul a ni.

Pep Guardiola-a'n tun hnaia hliam dam hlim Arjen Robben chu Thomas Muller aiah inkhel bul ṭan turin a thlang a, mahse beisei angin goal a keng tel lo. Dutch forward hi minute 60-naah Muller hian a rawn thlak.

Germany international Mul-ler hian goal khungna hun ṭha a nei a, Kingsley Coman hnen aṭanga a ball hmuh chu goal bar chungah a volley chhuak. Winger Douglas Costa chuan Leverkusen goal ban hrulah a tlawh out bawk.

Spanish midfielder Xabi Alonso chu minute 84-naah yel-low card vawi hnih hmuh vangin hnawhchhuah a ni a, Bayern hian minute 90 chhungin goal zawnah vawi khat chiah an pet a, kum 2010 November thla hnua an khingpuite goal zawna an pet tlem ber ṭum a ni.

Goal an khung lo chu thu hran nise Bayern hi goal an chhuah loh vanga lawm tur an ni, an centre-back zingah Jerome Boateng leh Javi Martinez te an hliam avangin midfielder Joshua Kimmich chu tlarhnungah dah a ngai hial. Heti chung hian Leverkusen hian Bayern goal zawnah vawi hnih chiah an pet thei ve tho a ni.

Bayern captain Philipp Lahm chuan league match 350 a khel tling ta chiah a, Bundesliga player tuna la inkhel zingah Claudio Pizarro (Werder Bremen), Stefan Kiessling (Leverkusen) leh Chris-tian Schulz (Hannover) te chiah ani aia khel tam an awm rih.

Bayern hian point 53 hmuin hmahruaitu an nih chhunzawm zel a, an hnungah point 45 hmu Dortmund an awm bawk.

Aubameyang an dang

Bundesliga top scorer nilai Borussia Dortmund forward Pierre-Emerick Aubameyang-a'n Hertha Berlin lakah goal a khung thei lo a, team pahnihte hi goal lut loin an ṭin.

Thomas Tuchel a naute hian kum 2016 bika an league match pahnihah hnehna chang thei ve ve mah se Hertha Berlin lakah an hriam tawk lo a, second half-ah Marco Reus leh playmaker Ilkay Guendogan te thawkrimin goal khung ngei tum mah se an hlawhtling thei bik lo a ni.

Dortmund leh Hertha Berlin te inkhel hi Chelsea manager hlui Jose Mourinho chuan a hmunah a en.

Inkheh banah zawhna chhang-in Dortmund coach Thomas Tuchel chuan, "Vawiin khan Mou-rinho khan kan inkhel a en ve tih pawh ka lo hre lo a, ka tan buaina tur a awm lo," tiin a dinhmun a derthawn loh thu a sawi.

Tuchel hian season ṭan dawn khan Dortmund a zawm a, league match 20 a khelh pui tawh aṭangin vawi 14 hnehna a chanpui thei.