Mumang ramin a tak ram a hnaih zel Manchester City 1 - 3 Leicester City

Kum 15 liam ta khan Sir Alex Ferguson-a enkawl Manchester United-in February thla-ah an elpui ber Arsene Wenger-a kaihhruai Arsenal hnehin Premier League-ah point nga zetin hma hruai ta se chuan United hi champion tur ang hiala sawi an ni tawh ang. Amaherawhchu tun dinhmuna league hmahruaitu erawh club naran Leicester City an nih tlat avangin, Etihad Stadium-ah Manchester City sawp mah se Foxes hi champion tur em chuan rin an la ni lo!

Inrinni zanah Leicester City-in Robert Huth goal hnih leh Riyad Mahrez te goal hmangin Etihad Stadium-ah 3-1 in hnehna an chang a, Manchester City hian goal thum an chhuah hnuah Sergio Aguero tauh luh hmangin goal khat an khung ve hram. Claudio Ranieri hote hian match 25 khelhah point 53 hmuin hmahruaitu an ni a, nikum tun ang hunah Foxes hian point 17 chauh hmuin table mawngphahah an awm.

Belhchian dawl Foxes

Inkhel an ṭan chauh a, Alge-rian winger Mahrez thawhrah sengin Chelsea defender hlui Huth-a'n a tauh lut nghal. Mi-nute thum chiah a la ral avangin City tan ngaih ṭhat lohna tur a awm loah a ngaih theih a, amaherawhchu first half-ah Foxes tlarhnung a phui ṭhat avangin Manuel Pellegrini hote tan fimkhur a ṭul tih a chiang.

Second half-ah Mahrez bawk chu City buaina a ni. Algerian winger hian Martin Demichelis chiang taka bumin minute 48-naah Leicester goal hnihna a khung. Ball chang tam City-in goal khungna chance
ṭha an insiam thei lo a, Foxes erawh counter attack hmangin goal tam zawk khung thei dinhmunah a ding - mualneitu vanneihna chu Jamie Vardy van-neih ṭum an tawng lo.

Contract pawtsei thar Vardy chungah ringawt an innghat lo tih lantirin German defender Huth-a'n minute 60-naah Leicester goal thumna a tauh lut. Hun tawp hma minute thum lek a la awmin Aguero-a'n City mualpho lutuk tur hliah khuhna goal a tauh lut a, Argentine striker hian goal dang khung belh leh thei mah se Leicester keeper Kasper Schmeichel-a'n goal dang a chhuah tawh lo.

Leicester hian an hnuai chiaha awm Tottenham Hots-purs chu White Hart Lane-ah an lo hneh tawh a, tun ṭuma an hneh erawh Manchester City a ni a, minute 90 chhunga an khelh dan nena thlirin an chak dan hi sawi nep theih a ni lo.

Aguero goal vangin khual-muala clean sheet vawi ruk nei turin match dang la nghah ngai mah se Etihad Stadium-ah Foxes tlarhnung hi a phui ṭha a, an defender-te hi an zinchhuahna lama point 28 an hmuh theihna kawngah an pawimawh tih a chiang.

City hi chak zo lo mah se champion thei dinhmunah an la ding reng a, Aguero an neih avangin tlarhma lam chu an ngaihtuah awm lo a, Pellegrini buaina tur bera lang chu an tlarhnung a ni.

Mahrez - Record

Kum 24-a upa Riyad Mahrez hian 2014 khan French Ligue 2 club Le Harve aṭang-in Leicester hi a zawm a, a leina man hi £400,000 chauh a ni. Algerian winger man hi Manchester United captain Wayne Rooney kar hnih hlawh aiin a tlem zawk a, Raheem Sterling man pound maktaduai 49 nen phei chuan khai khin rual a ni lo.

Amaherawhchu Mahrez hian khelmualah a theihna a lantir a, tun season-ah goal 14 khung tawhin assist vawi 10 a nei tawh. Algerian winger hi Premier League history-a goal leh assist vawi 10 (double figure) nei tling thei hmasa ber a ni.

Coach-te thukhawchang

City boss Manuel Pellegrini chuan, "Keini aiin Leicester kha an khel ṭha zawk a ni. In-khelh ṭan chauh a, set piece aṭanga goal kan chhuah kha inkhel ti danglamtu a ni. League hmahruaitu kan hmachhawn chuan inkhelh ṭantirh aṭanga bul ṭan ṭhat a ngai a, mah se kan hna kan tlin lo a ni," tiin an khelh
ṭhat tawk loh thu a sawi.

Season tawp ruala City chhuahsan tur Pellegrini chuan sawi chhunzawmin, "Match 13 khelh tur a la awm a, engmah la a chiang lo. Kan beisei loh ang result kan neih avanga beidawng tur kan ni lo, theihtawp chhuahin kan bei zel ang," tiin a sawi.

Leicester City coach Clau-dio Ranieri chuan, "Pressure tel loin kan khel a, nomawi chawi hi kan tum a ni lo, nuam ti takin kan khel tur a ni. Kan league khelh mek hi hriatthiam a har a, tuna kan tihtur chu Arsenal nena kan inkhelh tur chiah ngaihtuah a ni. April thla ngaihtuah thleng thei kan la ni lo a, season tawp lam inkhel harsat zia ka hrechiang. Tun hi Premier League ngaihnawm lai tak a ni a, tumahin champion tur an hre lo," tiin pressure insiam a tum lo.

Foxes elpui Manchester City leh Arsenal ten Champions League-ah champion beiseina tur an la nei a, Tottenham leh Manchester United ten Europa League an khel bawk. Hei chauh hi a ni lo, Leicester hi FA Cup aṭanga an tlak tawh laiin club dang pali erawh fifth round-ah an inpetkai vek. Ranieri hoten Premier League bak inelna hmachhawn tur an nei tawh lo a, season tira champion tura ring lo pawhin champion thei zingah an chhiar tel a ṭul tawh.