Vardy-a'n contract thar a ziak

Jamie Vardy chuan Leicester City-a kum thum dang cham turin contract thar a ziak. English striker hian kar khatah £80,000 a hlawh dawn a, kum 2019 thleng a cham dawn.

Kum 29-a upa Vardy hian kum 2012 khan Fleet-wood aṭangin Leicester hi a zawm a, tun season-ah goal 18 zet a khung tawh.

England striker chuan, "Leicester-a ka thil tawn ang hi hmun dang-ah ka la tawng ngai lo. He club tana ka theihna zawng zawng chhuah zel hi ka duh a ni. Leicester ka zawm tirh aṭangin he club hian ka chungah rinna an nghat a, tun dinhmun ka thlen theih chhan hi min rintawk vang chauh a ni. Min rinna tihlawhtling turin nitinin rim zawkin ka thawk ang," tiin a sawi.

November 2015 khan Vardy hian Premier League match 11-ah a zawnin goal a khung a, Manchester United striker hlui Ruud van Nistelrooy record a khum.

Foxes boss Ranieri chuan, "Jamie hian theih-tawp a chhuah ṭhin. Match tin mai hi a khelh tawpna tur ang hialin a khel ṭhin a, a rilru put hmang hi ka duh a ni. Kan bula hun rei zawk a cham tur hi ka lawm hle a ni," tiin an striker Vardy chu a fak hle.