Bengaluru ngamtu Odafa

Nigerian striker Odafa Okolie goal hnih hmangin Sporting Clube de Goa-in Sree Kanteerava Stadium-ah Bengaluru FC chu 2-1 in an hneh.

Bengaluru boss Ashley West-wood-a'n player naupang zawk aiin tawnhriat nei player a thlang a; Malsawmzuala, Len Doungel leh Sampingiraj te aiah player thar Michael Collins, Alwyn George leh CK Vineeth te a luhtir. English midfielder Collins hi Scunthorpe United, AFC Wimbledon leh Oxford United tan te pawha khel tawh a ni.

2014 champion Bengaluru hi Goan club lakah an tlawm ngai lo a, chak zawk tura rin pawh ni mah se ṭan aṭanga minute 9-na lekah English defender John Johnson-a ven hneh loh Sporting captain Odafa-a'n goal hmahruai a khung.

Sporting Goa tan player kim pawhin Bengaluru chelh a harsa dawn a, minute 21-naah defender Dharmaraj Ravanan-a'n yellow card vawi hnihna a hmuh avangin goal khung hmasa zawk ni mah se an dinhmun a la chhe zawk. Bengaluru-in an siphurh sut tumin an nawr zel a, second half-ah Beikhokhei Beingaichho chu tun season-a a vawi khatna atan inlanin mualneitu goal nawr a na sawt.

Bengaluru-in CK Vineeth hmangin player 10-a khel Sporting Goa lamah minute 64-naah an khung a, chak thei mai tura beisei ni mah se India ram football-a tawnhriat nei ṭha Odafa-a'n minute 73-naah Goan club chakna goal a khung.

Sporting Goa-in point thum hlu tak an hlawh chhuak a, Shillong Lajong nen point sarih hmuin table-ah panganaah an awm. Bengaluru erawh chak zo lo mah se point 12 hmuin hmahruaitu an ni chhunzawm zel a, amaherawhchu pathumna Mohun Bagan leh palina Mumbai FC ten khelh zat inangah 2014 champion Bengaluru point hmuh zat aia tam an la hmu thei ve ve.