Everton dal thei an awm lo

Premier League 'Big Six' tia hminglem an pek Liverpool, Manchester City, Chelsea, Manchester United, Arsenal leh Tottenham Hotspur ten lu haina tur an nei a, an hming chu Everton a ni. 

Carlo Ancelotti naute hian season tharah European football khelh ngei an tum tih pholangin Brighton & Hove Albion chu 4-2 in an hneh a, Merseyside club hian goal khung an bansan thei lo. 

Everton hian league match li chu hnehna an chang tawh a, namnul an harsa ṭan - heng match liah hian Dominic Calvert-Lewin chuan goal a la khung vek a, Everton player zinga he record nei thei hmasa ber a ni. 

Merseyside club tan James Rodriguez chuan a 'class' pholan chhunzawmin goal hnih a khung bakah assist a nei bawk a, Yerry Mina chuan goal khat a thawh bawk - Brighton tana Neal Maupay leh Yves Bissouma goal khungin awmzia a nei pha lo. 

August 2016 a Sheffield United aṭanga Everton a zawm hnuah Calvert-Lewin-a'n manager paruk a hrawn tawh a, a coach hrawn hmasak ber Ronald Koeman khan right wing back-ah chhawrin midangte tana hnathawk turin a ti. 

Ancelotti enkawlna hnuaiah erawh English striker hi goal khung tura mawhphurhna pek a ni a, midangte tana chance siamsak ṭhintu kha midangten an team chakna tura an rinrawlah a ṭang ta. 

Italian coach-in AC Milan a enkawl laia striker dik tak Filipo Inzaghi 'theihna' nen a khaikhin hial a, Inzaghi hi a vawi khat ball tawh 'finishing' larpuitu a ni - Italian striker ropui level-ah Calvert-Lewin hi dah chi erawh a la ni lo a, mahse Inzaghi thluak leh thiamna ang nei tur erawhin theihna a nei. 

Brighton nena an inkhelah pawh he theihna hi a pholang a, Bissouma tihsual nangchinga rang taka 'shot' a neih Mat Ryan-a'n a lo dan hman te, Gylfi Sigurdsson siamsak khung tura a positioning fuh lutuk leh a thiamna te hmuh hmaih theih a ni lo - he striker hian season hmasa khan inelna hrang hrangah goal 15 a khung a, tun season-ah match ruk khelin goal kua a khung tling ta. 

Kum 23 mi Calvert-Lewin-a'n duhawm taka season a ṭan theih chhan pakhat chu amah chawmtu zingah player ṭha bik an awm tak vang tiin a sawi theih a, Everton midfielder ni tawh zinga thiam ber ang hiala chhal ngam James Rodriguez a awm tlat. 

Colombian attacking midfielder hian Everton tan Premier League match li a khelhah goal thum khungin assist vawi hnih a nei ta a, Zinedine Zidane-a'n chhawr duh lo mah se amah chhawr duhtu Ancelotti enkawlna hnuaiah a thiam a la theihnghilh lo tih a pholang chiang hle. 

Brighton lakah pawh Rodriguez-a'n goal hnih a khung a, a goal pahnih hi Alex Iwobi leh amah ang thoa nipui transfer a Everton pantu Abdoulaye Doucoure siamsak a ni. Ancelotti-a'n nipui transfer a duhtaka a lakluh player-te an chet ṭhat chhunzawm zel. 

Everton boss 'King' Carlo chuan, "Ka sawi tawh angin player theihna nei sang bik hi chu khawiah mah an buai ngai lo. Player quality tan chuan football hi a awl hle - khelmual a inang reng a, kan khingpui player 11 an ni reng a, goal dinna a ngai reng a, ball ngai reng kan pet bawk. Football hi hriatthiam harsa a ni lo," tiin a player thar James-a chungchang a sawi. 

1969-70 season hnua a vawi khat nan Everton-in an league match hmasa paliah hnehna an chang a, goal 12 ngawt an khung bawk. Liverpool hliahkhuhna hnuaia awm reng Everton fan-ten khaw êng an hmu ve ṭan ta. 

Everton hian an match hmasa berah Tottenham Hotspur chu 1-0 in an hneh a, West Brom (5-2) leh Crystal Palace (2-1) an hneh tawh bawk - League Cup-ah quarterfinal lut turin Salford City (3-0), Fleetwood Town (5-2) leh West Ham (4-1) an hneh bawk. 

Ngun taka enin Everton hian an tlarhnung chinfel an mamawh tih erawh a lang tel a, goalkeeper Jordan Pickford hian a career ṭantir lamah fak hlawh viau mah se a 'class' tawk lo niin a lang. 

English keeper hi first half-ah Brighton lamin hna an siamsak meuh lo a, mahse an enchhin hmasak ber tih theihah holam takin ball a thlauh a, hei hi Maupay chuan goal-ah a chantir - Ocotber 17, tlai dar 5:00-ah Liverpool an mikhual dawn a, Everton tan fiahna hmasa tia chhal theih a ni ang.