Atletico-in goal an khung lo

La Liga club Atletico Madrid-in tun season a an league match hmasa berah goal ruk ngawt khung mah se a zawna goal an khung lohna ni turin Inrinni zan khan Villarreal chu 0-0 in an inhnehtawkpui. 

Atletico Madrid hian an mikhual lakah ṭhat chhuah tum loin vawi 13 ngawt shot nei mah se target a shot erawh an nei miah lo a, a tawpah chuan point khata an lungawi a ṭul.

Luis Suarez-a'n inkhel bul ṭan mah se Uruguayan striker hian a match hmasa bera goal hnih a khung ang khan goal net a zawng hmu zo tawh lo a, amah thlaktu Diego Costa-a'n danglamna a thlen thei bik lo. 

Atletico hian season bul ṭan nana an match hmasa berah Granada chu 6-1 ngawtin an hneh a, mahse a hnuah Huesca lah Villarreal hmachhawnin goal an khung lo ve ve. 

Nizan khan Atletico elpui Real Madrid leh Barcelona an inlan a, he thu buatsaih a nih lai hian result kan hre hman lo.