Zouma season a tawp

Chelsea defender Kurt Zouma chu a khup zai a ni dawn a, thla ruk chhung a chawlh a ngaih dawn avangin a season a tawp tawh. An ram France-a Euro 2016 khelh turah pawh a inlan thei dawn ta lo a ni.

Pathianni zan Premier League inkhela Chelsea leh Manchester United inhmachhawn ṭumin kum 21-a upa Zouma hi zuang chunga ball kang lak a tum na lamah tla sualin a khupah hliam a tuar.

Twitter-ah a hliam chungchang sawiin French rawlthar Zouma chuan, "Ka hliam endik a nih hnuah zai a ngai dawn tih hriat a ni a, tun kar chhungin min zai ang a, tunhma aia ṭha zawkin ka lo kir leh ang," a ti.

Chelsea lam chuan an defen-der hi a rei lo berah thla ruk tal an chhawr theih loh tur thu an lo sawi ve bawk. France centre-back hian London club tan hian match 32 khel ve tawhin tun hnaia an player rinrawl zinga mi a ni.

Kumin June thla hian France chuan European championship an thleng dawn a, he huna inlan ve beisei Zouma tan chuan a hliam hi a hun lo hle.

Blues manager lai-lawk Guus Hiddink enkawlna hnuaiah captain John Terry leh Zouma te hi an inkawp fuh hle a, a zawna match khaw chhung tlawmni hmel an hmuh loh nana an kulh pui pahnih an ni.