Ticket man to club-in a tuar em?

Kum 2014, April khan Liverpool-in an stadium an zauh tur thu an puang a, pound maktaduai 100 vel senna tur an project hi December, 2014 khan thawk
ṭanin season tharah peih hman beisei a ni.

Mi 45,500 len ṭhinna stadium-ah hian mipui 59,000 an leng tawh dawn a, hemi ina a ken tel chu ticket man tihto a ni. Liverpool hian season thar aṭanga an ticket man tur an puang a, an main stand ticket man £59 (Rs 5,816.55) ni ṭhin chu £77 (Rs 7,588.79 )-ah tihsan a ni.

Liverpool fan-te'n hei hi to uchuaka ngaiin Sunderland nen an inkhelh ṭumin an duh lohna an lantir a, minute 77-naah fans sing chuangin stadium an chhuahsan a, club neitute chu 'Mi duham te u, a tawk zozai ta e' tiin an au khum. Liverpool fans chhuak tau zinga hming langsar ber chu Reds legend Jamie Carragher a ni!

Reds a nghawng

Anfield-a Liverpool leh Sunderland inkhelh ṭumin Liverpool-in minute 77 thleng chu 2-0 in hma an hruai a, inkhel an thunun bawk avangin nuamsa takin an chak dawn niin a lang.

Mahse, minute 77 a nih rualin Liverpool ṭantu ruhkawl Spirit of Shankly leh Spion Kop 1906 -te huaihawtin fans sing chuangin stadium an chhuahsan a, hei hian khelmual chhungah nghawng a nei nghal.

Fan-te khawsak dan hian player-te rilru a luah tih hai rual a ni lo a, an concentration an hloh. Minute 80 hnuah holam takin goal hnih an chhuah a, point thum hmu tura inngai Reds chu point khat nen an lungawi a ṭul.

Enliam theih loh

Sunderland an hmachhawn hmain Liverpool chief executive Ian Ayre-a'n Reds fan-te chu ticket man chu uluk taka zirchiang turin a ti a, £59 ni ṭhin £77-a tihsan chu tih awm reng a nih thu a sawi.

Mahse, Premier League table mawng-phah team Black Cats an hmachhawnna inkhelah fans lungawi loin nghawng a neih thui theih dan Liverpool thuneitute'n a takin an hmu a, Reds fan-te'n ticket man tih hniam a nih hma chu hmalak zel an tum bawk si avangin an buai.

Liverpool neitu Fenway Sports Group chuan hmanhmawh takin Pathianni khan An-field official-te nen meeting an ko nghal chuk chuk a, ticket man chungchang hi zir-chiang-in tun kar chhungin thutlukna siam an tum.

A awm reng em?

Anfield-a banner langsar zingah 'A tawk zozai ta e ' tihte, 'Fan-te tel lo chuan football hi engmah lo mai a ni' tihte, 'Thudik chu kan hria e, duhamna hi football tan thil hlauhawm a ni,' tihte chu a langsar pawl an ni a, Liverpool fan-te'n sum aia fan-te an pawimawh hmasak zawk thu an sawi a - football khawvelin hei hi a pawmpui.

Eng nge an sawi?

Sunderland nen an inhnehtawk ṭuma Klopp-a aiawha team kaihruaitu first-team coach Pepijn Lijnders chuan, "Khawvela fans ṭha ber kan nei a, an duh loh zawng aupui turin dikna chanvo an nei a ni," tiin Liverpool fan-te hmalakna chu a dem loh thu a lo sawi tawh.

Liverpool manager hlui Roy Evans chuan, "Liverpool fan-te hian an lungawi lohna an lantir thiang a, he club tan hian an lo ding fo tawh ṭhin. Anni tel lo chuan Liverpool hi engmah lo mai a ni," tiin football club te'n sum ringawt ngaihtuah loa fan-te dinhmun an hriatthiam a ngaih thu a sawi.

Spirit of Shankly hotupa Jay McKenna chuan, "Kan dinnaah kan chiang a, hei hi a bul ṭanna chauh a ni. Engtinnge hma kan lak zel dawn kan la sawi thei lo a, fan-te thurawn lain hmalak zel dan tur chu kan rel ang," tiin ticket man tih hniam a nih hma chu hmalak zel an tum.

Liverpool club ṭhuthmun Merseyside huam chhunga Southport MP John Pugh chuan, "Liverpool ṭantu rinawm tak ka nihna angin fan-te hmalakna hi ka thlawp tlat a, club hian a sum sen a tam a nih pawhin fan-te hi anmahni dawrtu niloin
ṭawiawm ṭhintute an ni tih hi an pawm tur a ni. Ticket man to hi Liverpool chhungkuaa buaina siamtu mai a ni," tiin club neitute chu mipui vantlang mila ticket siam turin a ti.

Arsenal pawh!

Ticket man to vanga buai hi Liverpool chauh an ni lo a, nikum October khan Arsenal pawh ticket man to vangin an lo buai tawh.

German club Bayern Munich fan-te chuan nikum October thlaa Arsenal nen an inhmachhawn dawn ṭumin Gunners ticket man £64 (Rs. 6290.08) chu to an ti a, an duh lohna entir nan minute ngain Emirates Stadium-ah an lut tlai.

Bayern fan-te hian, 'Ticket pakhat manah £64! Fan-te tel lo chuan football hi engmah lo mai a ni' tih banner an keng lut.

Emirates Stadium-a Bayern Munich fan-te an luh rual hian Arsenal fan-te chuan a lawm nan kut an lo beng a, an ticket man tlawm an ti bik lo.

Klopp-a thukhawchang

Liverpool manager Jurgen Klopp chuan tun hnaia fan-te lungawi lohna chu a hriatthiam thu leh a rang thei ang bera chin fel a pawimawh thu a sawi.

German manager chuan, "Hei hi kan thil duh a ni lo a, club chhungkuaa mi chuan chinfel thuai hi kan duh vek. Inkhelh zawh hmaa chhuak turin kan fan-te hi kan duh lo a ni," tiin fan-te puihna tel lo chuan club chu engmah lo mai a nih thu a sawi.

Club dang a nghawng

Liverpool fan-te chet danin fak rawn a hlawh a, fan-te ngaihtuah lek loa football club ṭhenkhatin ticket man an ti to ṭhin chuan sawisel a hlawh a, Premier League club dang fan-te pawh chet chhuah an tum!

Football Supporters’ Federation chuan Thawhṭanni khan Premier League club 20 zinga fan organisation-te koh khawm vek an tum thu an puang a, inkhel en man to lutuk duh lohna lantir nan Liverpool fan-te tih angin inkhel en laia chhuak vek turin Premier League club fan-te chu ngen an tum.

FSF chief executive Kevin Miles chuan, "FSF chuan Premier League club fan-te kan ko khawm dawn a, kan kal zel dan tur kan rel ang. Hmalak dan tur chu a tam khawp ang, Liverpool fan-te'n Sunderland an hmachhawn ṭumin an lungawi lohna hlawhtling takin an lantir tawh a, fan-te hi ngaihthah mai mai chi kan ni lo tih an tilang tawh a ni," a ti.

Liverpool fan-te pawn tawp mai an la tum bik lo, stadium aṭanga an kalchhuahin awmzia a neih loh chuan club sponsor-tute lamah ṭuan an tum nia sawi a ni.

Kevin Miles chuan, "Liverpool hma-chhawp ang hian ke kan pen lo ang tih pawh kan sawi thei lo. Sponsor-te hian club thukhawchang ai chuan fan-te aw ka chu an ngaipawimawh zawk ngei ang," tiin fan-te tel lo chuan sponsor tute tan hlawkna tur a awm loh thu a sawi.