Kvitova leh Kenin an tlang

French Open hmei-chhe singles huangah player langsar che fuh lo awm nual mah se Petra Kvitova leh Sofia Kenin te chuan fourth round an inhlangkai a, anni pahnih hi champion tura rinkai zinga mi an ni.

Inrinni zan inkhelah seeded pasarihna Kvitova hian Leylah Fernandez chu 7-5, 6-3 in a hneh. Wimbledon champion vawi hnih ni tawh hi set hmasa zawkah 5-1 in hniam mah se tie break thlen puiin a tlang zawkah a ṭang a, set hnuhnungah chuan harsatna a nei tawh lo.

Czech Republic nula hian zaninah Chinese player Zhang Shuai a hmachawn leh dawn, quarterfinal lut tur chuan hna hautak a thawh a ngai tawh ang. Zhang hian kumin French Open-ah hian match li khel tawhin set a la hloh miah lo a ni.

Kum 30 mi Kvitova hian 2015 hnu lama a vawi khat nan Roland Garros last 16 a lut leh a ni a, tun hma pawhin clay court-ah hian a ropui viau ngai lo. Hliam leh harsatna hrang hrang a neih hnuah beiseina a nei sang ve leh tawh hle.

Australian Open champion lai Sofia Kenin tan harsatna a la awm lo. American player hian Irina Bara chu 6-2, 6-0 in a sawp, harsa vak loa Kenin a chak lai hian seeded pariatna Aryna Sabalenka erawh Ons Jabeur hmaah 7-6 (9-7), 2-6, 6-3 in a tlawm.

Kum 26 mi Jabeur hian last 16-ah chuan Danielle Collins a hma-chhawn ang. Inkhel dangah Collins hian 2016 champion Garbine Muguruza chu 7-5, 2-6, 6-4 in a hneh ve thung. Muguruza te hi a tirah chuan Court Simonne Mathieu-ah an inkhel, game hnih hnu lekah ruah sur vangin a chung khuhna nei Philippe Chatrier-ah sawn an ni.