Spurs striker thar Vinicius

Tottenham Hotspur chuan Brazilian striker Carlos Vinicius chu Benfica aṭangin season khat chhung atan loan-in an lalut a, loan a hawh manah hian pound maktaduai 2.7 an inseng. 

Kum 25 mi forward hi season tawpah Spurs hian an duh chuan a nghetin an lalut thei dawn a, pound maktaduai 40.83 an pek belh a ngai dawn thung. 

Vinicius hian season hmasa khan Primeira Liga-ah goal 18 khungin top scorer a ni a, Harry Kane thachhang dawltu ni tura ngaih a ni.  

Benfica tan season hmasa inelna hrang hranga goal 24 khungtu striker chuan, "In hlimna ṭawmpui tur leh nomawi chawi turin he chhungkua hi ka rawn zawm a ni," tiin a sawi. 

Hetihlai hian Spurs defender Juan Foyth chuan kum 2023 thleng London club tana khel turin contract thar a ziak a, season khat chhung atan loan-in Villarreal a zawm zui. 

Kum 22 mi defender hian August 2017 khan Argentine club Estudiantes aṭangin Spurs hi a zawm a, inelna hrang hrangah match 32 a khelhsak tawh. 

Argentina tana vawi 10 inlan tawh defender hian tun season-ah erawh Spurs tan a la khel lo a, inchher hriam turin La Liga lam a pan ta a ni.