Europa League Sevilla lakah Wolves an tlawm

Wolverhampton Wanderers-in Europa League semifinal thlen theihna hun ṭha an bawhpelh a, Raul Jimenez-a'n penalty hlahin vawi nga champion tawh Sevilla lakah an tlawm.

Thawhlehni zan inkhelah Lucas Ocampos-a'n minute 88-naah goal awmchhun a tauh lut a, Sevilla 1-0 in an chak. Spanish club hian Europa League semifinal-ah Manchester United an hmachhawn ang.

Nuno Espirito Santo hoten season ṭha tak an hmang a, amaherawhchu Premier League match tawp bera Chelsea an hneh loh avang leh FA Cup-a Arsenal an champion tak avangin season thara Europe-a inlan tur chuan Europa League-a champion ngei a ṭul.

Europa League last 16 first leg-ah Espanyol 4-0 zeta an sawp avangin Wolves tan champion hi a sawi rik ngam a, quarterfinal thleng turin Greece club ṭha Olympiakos an hneh leh bawk.

Duisburg, Germany-a inkhelah Wolves-in bul an ṭan ṭha a, Adam Traore-a'n a tlan chakna hmangin Diego Carlos lakah penalty a hlawh chhuak. Raul Jimenez rawn pen chhuakin Mexican striker hian Wolves tan penalty vawi riat a pet tawhah a pet goal vek avangin hma an hruai ngei a rinawm hle.

Amaherawhchu Jimenez-a'n goal zawnah pet mah se Sevilla keeper Yassine Bounou (Bono) tan dan a nuam tawk. Moroccan keeper Bono hi kum 2010-a  CSKA Sofia goalkeeper Rais M’bolhi-a'n (Algeria) penalty a dan hnua Europa League-a African player penalty dang leh hmasa ber a ni.

Sevilla an insiamrem thuai a, Europa League-a tawnhriat ngah zawk an ni bawk nen inkhel an thunun nghal. Spanish club hian ball possession pawh 75% zet an nei a, goal attempt pawh vawi 18 neiin Wolves aiin a let thuma an ngah zawk avangin chak phu zawk an ni hrim hrim.

Minute 88-naah Ever Banega freekick pet chu Lucas Ocampos-a'n ṭha zetin a tauh lut a, Wolves keeper Rui Patricio tan dan rual a ni lo. River Plate aṭanga inzir chhuak Argentine forward Ocampos hian tun season inelna hrang hrangah goal 17 a khung tawh a ni.

Sevilla playmaker Ever Banega-a'n ṭum dang ang bawkin a khel ṭha, Wolves player zingah vawi 44 ball khawih theih an awm loh laiin Argentine midfielder hian vawi 140 zet ball a khawih a, vawi  118 zet pass a neih bakah chakna goal an khung theihna turin ṭha takin freekick a pet bawk.

Sevilla manager Julen Lopetegui chuan, "Manchester United kan hmachhawn dawn a, khawvela team lian ber an  ni. Mahse he team hmachhawn tur hian kan inbuatsaih ang. Ṭum danga kan tih ṭhin angin kan theihna zawng zawngin kan khel dawn a, chak theih kan inring bawk ang," tiin an khingpui tur Manchester United fak siin an hneh theih thu a sawi.

Spain leh Real Madrid manager hlui Lopetegui-a'n English club ropuizia a sawi a, Europa League-ah erawh Sevilla hi a ropui zawk chu an ni. Spanish club hian vawi nga Europa League final lut tawhin an la chak vek a, champion ngun ber niin final-a an hneh zingah English club Liverpool leh Middlesbrough te an tel a ni.