PSG-in Angers lakah goal surtir

Paris St Germain chuan season bul ṭan fuh tawk lo mah se an insiamṭha leh tawh. French champion hian Zirtawpni zan khan Angers 6-1 in an sawp a, an thiampuipa Neymar chuan tun season bika a goal hmasa ber leh pahnihna a khung.

Parc des Princes hmuna inkhelah PSG lamin ball chang hnemin inkhel an thunun a, a khat mawi tawkin goal an khung deuh reng. Alessandro Florenzi-a'n minute sarihna lekah goal hmahruai a khung ṭan.

Pound maktaduai 200 man Neymar-a'n minute 36 leh 47-naah a khung belh. Julian Draxler (57'), Idrissa Gana Gueye (71') leh Kylian Mbappe (84') ten goal khat ṭheuh an khung belh bawk. Mikhual tana Ismael Traore goal khung chu mualpho hliahkhuh nan pawh a tawk zo lo.

PSG hian season hmasa khan Champions League final an khelh vangin season thar an ṭan tlai bik a, an league match hmasa pahnihah an tlawm bawk avangin an dinhmun a hniam hman hle, nomawi hloh mai pawh thil hlauhawm a ni hman.

Mahse, player nei ṭha chu an hniam reng thei lo. Ligue 1 match ruk an khelh meuh chuan point 12 an nei leh tawh a, pathumnaah awmin hmahruaitu Rennes an phak lohna chu point khat chauh a ni - Rennes hian match khatin an la khel tlem thung.

Angers coach Stephane Moulin hian 2011 aṭang khan a team hi a enkawl ṭan a, European league lian panga zingah chuan tun dinhmunah club ngai enkawl rei ber a ni mek. PSG lakah tlarhnung rem phui tumin player panga ngawt dah tlar mah se Neymar leh a ṭhiante an dang thei lo.

Stephane Moulin chuan, "Nipui bazarah kan player ṭha ṭhenkhat an chhuak a, a hnawh khahna kan la neih loh bakah kan rilru a khingbai deuh tih a lang. Tuna kan chak loh avang hian ka chhe ta duai tihna a ni bik lo, kan tho chhuak leh ang," a ti, point kua neiin pakuana dinhmun an luah mek.

Match hnih an chak loh hnuah PSG chu a zawnin match li an chak leh ta a, manager Thomas Tuchel erawhin a la duhtawk lo. German manager hian club thuneitu lam chuan a duh ang player an lakluhsak tawk lo niin a sawi a, a thu sawi vangin club thuneitu lam an lawm lo.

Paris Saint-Germain sporting director Leonardo chuan, "Lungawi lohna nei an awm a nih chuan kan sawifel mai tur a ni a, inthlak a ngai a nih pawhin kan thlak mai ang. Tuchel hian kan hnena cham zel a duh a nih chuan club inkaihhruaina dan leh hrai a zawm tur a ni," tiin thu dengkhawng tak a sawi.