I League hmahruaitu thar East Bengal
Kingfisher East Bengal-in Barasat stadium-ah Shillong Lajong chu 3-0 in an sawp a, match sarih khelhah point 14 hmuin I League hmahruaitu an ni.
Thawhlehni zan inkhelah Red and Gold Brigade tan Ranti Martins-a'n first half-ah hattrick a siam a, second half-ah Bikash Jairu-a'n goal khat dang khung belh lehin Sikkimese winger hi match zawnin hero of the match a thlan a ni.
East Bengal hian Bengaluru aiin point hnihin an hmu tam a, nizana Blues leh DSK Shivajians result a zirin Red and Gold Brigade dinhmun a danglam ang.
Ranti Hattrick
East Bengal boss Biswajit Bhatta-charya-a'n Aizawl FC an hneh ṭuma an thlak vanga lungawi lo South Korean forward Do Dong-Hyun chu bench-ah ṭhuttirin a aiah Sanju Pradhan-a'n starting eleven a chang.
Mikhual team Lajong-in bul an
ṭan ṭha a, Boithang Haokip cross chu Bipin Singh-a'n East Bengal keeper Luis Barreto chauh hmachhawn mah se goal zawnah a tauh thei lo.
Shillong Lajong-in an hun ṭha bawhpelh an tuar a, minute 17-naah Mehtab Hossain-a through ball chu Sanju Pradhan-a'n umin cross ball ṭha tak a nei zui a, Nigerian striker Ranti-a'n a pet goal chiang hle.
East Bengal forward Ranti Martins-a'n player ṭha a ni tih lantir zuiin minute 26-naah box pawn aṭangin kawh zetin a pet a, Lajong keeper Vishal Kaith-a'n a en liam. Nigerian striker hian minute 37-naah Lajong defender leh keeper-te bumin goal thumna a khung leh bawk.
Second half-ah East Bengal-in inkhel an thunun a, amaherawmchu minute 52-naa Jairu-a'n an goal lina a khung hnuah goal dang an khung belh tawh lo. Minute 82-naah Lajong defender Konsham Singh chu hnawhchhuah a ni a, Manipuri defender hian Aizawl FC a hmachhawn thei lo ang.
Eng nge an sawi?
Nigerian striker Ranti chuan, "Coach-in zalenna min pe a, ka hna chu goal khung a ni a, a bak ti turin min ti lo. Result ṭha tak kan nei a, amaherawhchu kan hmabakah tih tur tam tak a awm a, hmahruaitu nih kan tum zel ang," tiin a sawi.
I League-a vawi li zet top scorer ni tawh Ranti chuan Hero of the match a thlan a ni lo chu a thlangtuten an duhsak loh vanga a ngaih thu a sawi tel bawk.
Shillong Lajong coach Thangboi Singto chuan, "Team pahnih dang-lamna chu Ranti a ni. A goal khung pathum zinga pahnih phei kha chu player naran tih theih chi a ni lo," tiin hattrick siamtu Ranti a fak.
Mizo paruk awmna Shillong club hian tun Inrinni hian Rajiv Stadium, Mualpuiah Aizawl FC nen North East Derby an khel ang.