Arsenal beiseina siamtu Ozil - Rosicky

Tomas Rosicky chuan kum 2003-04 hnua Arsenal-in Premier League title an lak leh theih nana an inngahna leh beiseina siamtu chu Mesut Ozil a nih thu a sawi.

German international Ozil hian kum 2013 khan Real Madrid aṭangin Gunners hi a zawm a, FA Cup title a lakpui der tawh. Tun season-ah pawh league-ah a ṭhiante goal khung tur vawi 16 siamsak tawhin champion beisei thei dinhmunah a hlangkai mek.

Kum 27-a upa Ozil hian kartawpa Arsenal-in Bournemouth 2-0 a an hneh ṭumin goal hmahruai a khung nghe nghe.

Czech international Rosicky chuan, "Mesut hi kan hnena a rawn kaltirh aṭang khan a thiamna hi nitin kan hmuh belh zel a, season hmasa kha hliam a neih avangin a khel ṭha tawk lo pawh a ni thei e. Tun season-a a khelh dan erawh a ṭha hle a ni," a ti.

Rosicky chuan Alexis Sanchez chungchang sawi lang telin,"Alexis leh Ozil te hi player ṭha bik an ni a, anni pahnih hi chuan inkhel hi an thlak danglam hlawk thei. Chak duhna thinlung an neih avangin Gunners tan chuan title lak beiseina chhem alh tu an ni," a ti.

Tun dinhmunah kum 35-a upa Rosicky hi a malpui na vangin a inkhel thei lo mek a, a hliam vang hian thla thum vel a chawlh a ngai ang.

Kum 2006-a Gunners zawmtu Rosicky hian tun season tawp thleng chauh a club-ah hian contract a neih tawh avangin Emirates Stadium-ah chuan a inkhel kan hmuh a beiseiawm tawh loh.