Chelsea-ah Allegri, United-ah Mourinho?

Pathianni zan khan Stam-ford Bridge-ah Chelsea leh Manchester United ten football hmuhnawm an lantir a, hun tawpah 1-1 in a inhnehtawk. Minute 90 chhunga an khelh dan thlirin club pahnihin team
ṭha an ni tih an phochhuak ve ve a, amaherawhchu league table-a an dinhmun a ṭhat loh avangin season tharah manager thar an neih ve ve a rinawm.

Chelsea-ah Allegri?

London club Chelsea-in Jose Mourinho an ban hnuah manager nghet an la nei lo a, manager lailawk Guus Hiddink-a contract hi tun season tawp rualin a tawp ang. Blues hotuten Dutch manager contract pawhsei aiin manager thar an lak an rinawm zawk.

Chelsea manager thar tur an inrinsiak a, chung zinga hming langsar chu Juventus manager Massimiliano Allegri a ni.

Allegri lo enkawl tawhtu coach Giovanni Galeone chuan, "Max hian Chelsea a pan ka ring a, a hlawhtling ka ring bawk. Allegri hian Juventus-ah hna
ṭha tak a thawk a, a player duh ang Mario Gotze leh Isco te a la thei lo chungin a result neih hi a ropui a ni," tiin Juve coach Allegri a fak.

Kum 75-a upa Galeone chuan sawi chhunzawmin, "Ka ngaihdan dik tak chuan Chelsea neitu Abramovich-a'n Allegri hlawh atana pek a huam zat hi a tam em avangin England a pan ka ring. Amah hi khawvel coach ṭha panga zinga telpha a ni a, Italy-a a awm reng a ṭulna a awm lo," tiin a a sawi.

Allegri enkawl Juventus-in season bul ṭan ṭha lo mah se match 24 khelh zawhah point 54 hmu leh tawhin hmahruaitu Napoli point hnih chiahin an pha lo. Italian manager hian nikum season khan Juve hi Serie A leh Coppa Italia-ah a champion pui a, The Old Lady (Juventus kohna) a enkawl hma hian AC Milan kaihruaiin 2010-11 season-ah Serie A-ah a lo champion pui tawh bawk.

Juventus-a Allegri contract hi nakkum hian a tawp dawn a, Italian club hian an manager hi chhuahtir erawh an tum lo hle. Club general manager Beppe Marotta chuan, "League, Coppa Italia leh Champions League-ah kan la champion thei vek a, Allegri hnathawhah hian kan lawm a ni. Keini chuan kan bula awm zel turin kan duh. Chelsea-in an duh tih kan hria a, ani hi club lian tak ni mah se ka sawi duh chu tuna a club enkawl mek Juventus pawh hi club lian a ni," tiin Chelsea laka an manager chhuahtir mai an tum lo.

Allegri pawhin Chelsea nena an sawi zawmna hi a pha ve bawk. Italian manager chuan, "Thuthang mai a ni a, thudik a awm lo. Chuvangin ka hmalam hun chungchangah hian sawi tur ka nei lo. Ka sawi theih awmchhun chu kum khat dang contract ka la neihah hian nomawi a tam thei ang ber lak ka duh," tiin a sawi.

Chelsea hian manager an zawng a, Allegri bakah hian Juventus a zawna vawi thum lo champion puitu Italy national team coach Antonio Conte nen sawi zawm an ni bawk. Italian manager Conte hian a contract a pawtsei lo a nih chuan European Championship 2016 zawh rualin a tawp ang.

United-ah Mourinho?

Manchester United-in David Moyes-a kaihhruaina hnuaiah Champions League an khel pha lo a, Dutch manager Louis Van Gaal-a'n season khatnaah Red Devils chu UCL khel thei turin a hruai let. Sum ṭhahnem tak hmangtu Dutch manager Van Gaal-a'n beisei a pha lo zui a, Champions League-ah group stage aṭangin an tla nghal a, Pre-mier League-ah an talbuai bawk.

United hotuten Dutch mana-ger lakah dawhtheihna lantir mah se media lam erawhin a thlaktu tur an inring siak a, Jose Mourinho hming a ri ring hle.

Red Devils boss Van Gaal chuan, "Khelmual chhunga kan khelh dan dik tak ziak loin thu phuahchawp inziak. Fergie meuh pawhin Manchester United a enkawl ṭantirh chuan harsatna a tawk a, thil hluite pawh hi in zir let a ṭul a ni," tiin media lam chu thu dik lo ziakah a puh.

Dutch manager thusawi hi a dik a ni thei a, amaherawhchu Manchester City-in Pep Guar-diola an lakluh takah chuan media lamin United zawm tura Jose Mourinho an sawi hi thil ni thei tak a ni. Portuguese manager hian United enkawl a hreh loh thu hi tun hma pawhin a lo sawi fawh tawh a, tunah chuan Dutch manager aiin Mourinho hi season thara Red Devils enkawl turin a rinawm tawh zawk.