Zanin dar 7:00-ah Goan Derby

I League-ah Goan club-in record an nei ṭha ber a, tun season-ah erawh Goan club aiin Kolkata club an langsar zawk. Zanin dar 7:00 hian Fatorda Stadium-ah Sporting Clube de Goa leh Salgaocar ten Goan Derby an khel dawn a, inkhel tur hi relegation battle tiin a sawi theih a, Ten Action-ah pekchhuah a ni ang.

Salgaocar-in season ṭantirh match lia point an hlawhchhuah loh avangin an coach Malky Thomson an ban a, Scottish coach aia an lakluh chu Santosh Kashyap a ni. Coach thar enkawlna hnuaia an match hmasa berah Salgaocar-in Goa-ah Aizawl FC an draw nghal a, minute 90 thleng pawha goal khata hmahruaitu an nih avangin point thum an hlawh chhuak lo hi an vanduaiah a ngaih theih.

Sporting Clube de Goa erawhin Mizoram-ah Aizawl FC an hneh a, Karnataka-ah Bengaluru FC an hneh leh bawk avangin tun season-ah Salgaocar aiin an che ṭha zawk a, amaherawhchu DSK Shivajians an draw tawh bakah Shillong Lajong leh East Bengal te an hneh loh avangin tla thei dinhmunah an la ding.

Salgaocar-in point khat chauh hmu mah se player ṭha forward Darryl Duffy, winger Jackichand Singh leh keeper Karanjit Singh te an kawl a, Sporting Goa lam tan foreigner pali Odafe Onyeka Okolie, Densil Theobald, Mahmoud Amnah leh Loveday Enyinnaya te an ṭangkai em em bawk. Goan club pahnih hi an ṭha a, amaherawhchu tun season-ah anni aia club ṭha an awm. Club pakaw awm zingah DSK Shivajians an relegate thei lo a, hei vang hian Goan club pahnih, Aizawl FC leh Shillong Lajong te hi relgation battle-a tel chiangah a ngaih theih.