Europa League player ṭha ber Lukaku

Inter Milan striker Romelu Lukaku chu Europa League player of the season atan thlan a ni a, he chawimawina dawng tur hian Bruno Fernandes leh Ever Banega te a khum a ni.

Lukaku hian Inter Milan tana a season hmasa berah goal 34 ngawt a khung, Europa League final thlenpuiin nomawi chawi chiah lo mah se knockout stage chinah chuan match tinah goal a khung vek.

Belgium international hian award dawng tur hian point 270 a hmu a, amah hnaih bertu Fernandes (128 points) nen an inthlau hle. Pathumna chu point 118 hmutu Sevilla midfielder Ever Banega a ni thung. Award dawng tur hi Europa League group stage khel club 48 coach ṭheuh bakah, journalist 55 ten an thlang a ni.

Kum 27 mi Lukaku chuan, "Hetiang din-hmuna min dahtu Pathian chungah lawmthu ka sawi, ka nu leh ka unaupa ten tawp chin nei loa min thlawpna avanga hetiang dinhmun thleng thei hi ka ni. Award hi mahni maia dawn theih a ni lo a, ka ṭhiante min puihna zara dawng ka nih avangin he chawimawina hi kan zavaia tan a ni," tiin a sawi.

Antonio Conte enkawl Inter hian season tharah chuan Champions League an khel dawn. Group B-ah vawi 13 champion tawh Real Madrid, Shakhtar Donetsk leh Borussia Moenchengladbach te nen an awm khawm.