MBBA League Final Game 2-ah VR4 an tho chhuak thei ang em?

11th February, 2016

Mizorama basketball inelna sang ber Mizoram Super League (MSL) season 3 khel thei turin Hollow BSSP dinhmun a ṭha tawh a; Chawnpui VR4 tan beisei a la bo chuang lo. Vawiin chawhnu dar 1:30 hian Hawla Indoor Stadium, Republic Vengthlangah final game 2 khelh tur a ni ang.

Mizoram Basketball Asso--ciation buatsaih MBBA League Division 1 final inkhel hmasa berah Thawhlehni khan Hollow BSSP chuan 86-80 in VR4 lakah hnehna an chang tawh a, vawiin hian hnehna an chang leh thei a nih chuan an champion dawn.

Amaherawhchu, VR4 hian vawiin hian hnehna an chang let thei a nih chuan vawi khat an inhmachhawn leh a ngai thung dawn a ni. Final-a chak lo zawk hian MSL season 3 playoff an khel thung ang.

VR4 an zam lo

Chawnpui VR4 secretary Robert Laldinpuia chuan, "Final match hmasaah khan kan vanduai a, inkhel inhnehtawk takah kan chak loah ka ngai. Kan tlarhnung lam kan veng uluk tawh dawn a, beisei kan la neih avangin hneh let ngei kan tum ang," a ti.

Final match 1-a hliam VR4 small forward Vanlalmuana chu a hliam na lo a, vawiin hian a inkhelh thei beisei a ni. Player dang hliam leh harsatna nei an neih loh avangin phuba lak ngei an tum dawn.

Hollow an inring tawk

Attacking game khel thiam Hollow lam hian an match hmasa zawkah hnehna chang mah se defensive game khelh an la tum chuang lo. Small forward R. Lalnunpuia chu hliam vangin a khelh theih dawn leh dawn loh a chiang lo a, ani hi a khel thei a nih chuan inngahna tham a ni leh ang.

Sports and Youth Services coach, tuna Hollow BSSP en-kawltu Samuel Lalthlamuana chuan, "Kan inkhelh danah thlak danglam vak tur a awm hran lo a, kan ṭhat dan berin kan khelh leh ang a, hnehna kan chan leh ngei pawh ka beisei," tiin Vanglaini palai a hrilh.

Division II final

Vawiin chhun dar 12:00 hian MBBA League Division II inelna hmawr bawk a ni dawn a, Division I final game 2 khelh hmain Bethlehem BC leh Tuikual South te an inhmachhawn dawn a ni.

Division II final khelh tur pahnihte hi season thara Division I league khel turin an tling chiang tawh.