Neville-a chet chhiat vanga lawm Crespo

Argentina striker ropui chawl ta Hernan Crespo chuan Valencia-a beisei phak lo tak Gary Neville-a chet chhiat vanga a lawm thu a sawi.

Neville hian Valencia a enkawl hmain Sky Sports lamah football pundit hna a thawk a, ṭawngkam a hmang ngeiawm ṭhin hle. Spanish club a enkawl hnuah league match-ah chak hmel a la hmu lo a, Copa del Rey semifinal first leg-ah Barcelona-in 7-0 in an sawp bawk.

Valencia hian nizan khan Bar-celona chu Copa del Rey semifinal second leg-ah an mikhual a, he chanchin buatsaih a nih lai hian an result erawh kan hre hman lo.

Serie B club Modena manager hna chelh mek Crespo chuan, "TV aṭanga inkhel en leh bench-a ṭhu chunga en chu a dan danglam tak a ni. Valencia-a Gary Neville chet chhiat vang hian ka hlim zawk hialin ka hria - TV pundit a nih lai khan a sual thiam em em a ni," tiin England defender hlui chuan coach-te zahna a tlakchham ṭhin thu a sawi.

Crespo chuan Chelsea-a a khelh laia a manager ni ṭhin Leicester City manager ni ta Claudio Ranieri chu fak nghalin, "Ranieri hnuaia ka khelh lai kha chuan club kha Roman Abramovich-a'n a lei hlim a ni a, player thar an tam em em a, hnathawh tur kha a tam a ni. Khati chung khan league-ah pahnihna kan ni a, Champions League semifinal kan khel bawk a, ban a tawk kha chu a vanduai a ni," tiin a manager hlui chu a dah sang hle.