West Ham-in Payet chelh ngheh tum

Premier League club West Ham chuan an midfielder pawimawh Dimitri Payet chu contract thar ziahpui tumin an dawr mek.

France international hian nipui transfer lai khan Hammers hi French club Marseille aṭangin pound maktaduai 10-in a zawm a, kum nga cham turin contract a ziak.

Payet-a contract hi la rei viau mah se tun hnaiah a khelh ṭhat em avangin dawrtu a nei nual a, West Ham hian Upton Park-ah nghet lehzual tura contract thar ziahpui hi an duh a ni.

Hammers manager Slaven Bilic chuan, "Payet hi kan hnenah a hlim em em a, engkim kan chingfel thuai ang. Hmalam pana kal zel duh club kan ni a, hmasawnna tura pawimawh hmasa ber chu khelmual chhungah a ni. Kan player ṭha ber berte kan kawl reng theih nan theihtawp kan chhuah zel dawn a, Payet hi kan player ṭha ber a ni," a ti.

West Ham tan vawi 22 a inlana goal ruk khung tawh Payet hi China club an hming tarlan loh chuan pound maktaduai 38-a lakluh tumin an dawr mek nia sawi a awm bawk a, kum khatah pound maktaduai 7 vel hlawh tir an inhuam.

Mahse, kar khata £125,000 hlawh phut mek nia an sawi Payet chuan, "Ka lo sawi fo tawh ṭhin a, ka sawi nawn leh ang. West Ham kawr ka ha thei hi ka inchhuang a ni. Ka hmalam hun chu he club-ah hian a awm a, kum tam zawk ka cham ka beisei," tiin English club-ah contract thar a ziah ngei hmel hle.