German Cup Fans lungawi lo karah Dortmund chak awlsam

Liverpool fan-te'n Sunderl-and an hmachhawn ṭuma ticket man to vanga an lungawi lohna an lantirin awmzia a nei zel a, Premier League club zinga nghawng a neih hnuah Germany thleng a kang kai ta.

Thawhlehni zan khan Borus-sia Dortmund fan-te chuan ticket man to vanga an lungawi lohna DFB-Pokal quarterfinal-a VFB Stuttgart an hmachhawn
ṭumin an lantir a, fan lungawi lo karah 3-1 a chakin German Cup semifinal an lut.

Dortmund fan-te hi minute 20-in khelmual chhungah an lut tlai a, khelmual chhungah tennis ball an vawm lut bawk. VFB Stuggart khelmuala inkhel en man hi away fan-te tan bika an siam hi £55 (Rs. 5,402) a ni a, ṭhu chunga inkhel enna man tlawm ber chu £30 (Rs. 2,946) niin ding chunga enna man tlawm ber chu £15 (Rs.1,473) a ni thung.

Lungawi lohna lantir tura an khaipa zinga mi Dortmund fan Marc Quambusch chuan, "Kan thil tih hi kan duhzawng ni lo mah se hetianga hmalak hi a ṭulin kan hre si a ni. Minute 20 chhung kan club kan ṭawiawm theih loh avangin pawi kan ti a, mahse hetianga hmalak hi a ngai miau si," a ti.

Quambusch chuan Liverpool fan-te'n lungawi lohna an lantir chu an thlawp tlat thu sawiin, "Fan-te'n thil ṭha lo do zawnga hma an lak hi chuan a lawmawm a, Liverpool fan-te lamah hian kan ṭang tlat a ni. Reds fan-te hmalakna hian club dang pawh a nghawng zel kan beisei. English football hi ngaina mah ila sum vangin a thi mek a ni," tiin ticket man to chuan nghawng a neih nasat thu a sawi.

Dortmund fan-te ticket man-ah lungawi lo viau mah se khelmual chhungah erawh an duh ang result an hmu a, Germany international Marco Reus-a'n Dortmund hmahruaina goal a khung hnuah mualneitu team tan Lukas Rupp-a'n chhanglet mah se awmzia a nei thui lo.

Pierre-Emerick Aubameyang leh Henrikh Mkhitaryan-te'n Dortmund tan goal an khung ve leh a, an mikhualna ramah 3-1 in an chak. Gabonese striker Aubameyang-a tan he inkhela a goal hi tun season-a goal 30-a khungna chiah a ni.