Liverpool-in Hammers an ngam thei lo

Thawhleni zana FA Cup fourth round second leg-a Liver-pool leh West Ham an inhmachhawn hmain team pahnih hi tun season-ah vawi thum an inhmachhawn tawh a, Reds-in chak result an hlawh chhuak zo lo vek.

Vawi li an inhmachhawn-naah meuh pawh engmah a la danglam lo - Hammers khelmualah 2-1 in Liverpool an tlawm a, FA Cup-ah beisei tur an nei ve tawh lo. Team pahnih hi fourth round inkhel hmasa zawkah Anfield-ah 0-0 in an lo inhnehtawk tawh a ni.

Mualneitu team tan chawlh-lawk hma lawkin Michail Antonio chuan goal hmahruai a khung a, Liverpool tan hun rei tak hliam vanga a chawlh hnua lo kir Philippe Coutinho chuan free-kick aṭangin a sut.

Hun pangngaiah team pahnih hi 1-1 in inhnehtawk mah se extra time an khelh hnu-ah Hammers an vannei zawk. Minute 120 thleng goal a luh loh hnuah West Ham-in Angelo Ogbonna hmangin injury time-ah goal an khung a, Liverpool tan sutna hun a awm tawh lo.

Inkhel hmuhnawm

West Ham manager Slaven Bilic-a'n duhthlan theih ni ta se Premier League-a palina dinhmun hauh phak ai chuan FA Cup-a champion a duh zawk thu a sawi a, dawt a sawi lo tih nemngheh nan Liverpool hmachhawn turin a player neih ṭhat ang ber a thawhchhuah pui.

Reds manager Jurgen Klopp-a'n a dan pangngaiin FA Cup-ah player naupang rual a chhawr thung a, Premier League-a Sunderland nen an inhnehtawk ṭuma inkhel bul ṭan zingah goalkeeper Simon Mignolet chiah West Ham laka inkhel bul ṭan awmchhun a ni.

Minute 120 chhungin team pahnih an inngam tawk a, game rang leh hmuhnawm mipui tan an chhawp chhuak. Team pahnihin an tlarhnung an in rumṭhaih tawn zak zak a, goal post an pet per ve ve bawk.

FA Cup leh Hammers

West Ham hi FA Cup-ah vawi thum an champion tawh a, an champion hnuhnung ber erawh kum 1980 khan a ni tawh.

Mahse Croatian mana-ger Bilic-a'n FA Cup a ngaih-pawi-mawh zia a sawi tawh a, last 16-ah league match riat chhung chak lo zawn tawh Blackburn an hmachhawn dawn bawk avangin FA Cup-a an kalkawng a lang awlsam rih hle.

Hammers tana pawimawh ber tur erawh an midfielder ṭangkai Dimitri Payet a ni ang. France international hian Liverpool an hnehna inkhelah an goal hmahruai khung nan a thawhhlawk a, an chakna goal Ogbonna-a tauh luh hi a free-kick aṭanga ball kal a ni bawk.

Tu nge dem tur?

Liverpool-in West Ham an hneh lohna inkhelah hian dem tur an zawng dawn a nih chuan pound maktaduai 32 man Chris-tian Benteke hi dem tur a ni ang.

Brendan Rodgers-a'n Liver-pool khelh dan nen a in mil lo tih hre reng chunga a lakluh Belgian striker hian inkhelh chhung zawngin goal-ah vawi kua petin a pet goal lo vek.

Hun pangngaiah vawi hnih lai pet goal-na hun a nei a, Hammers keeper Darren Randolph chuan hnai tak aṭangin a dang ve ve. Extra time-ah Aston Villa striker hlui hian awlsam taka thun theihna chance a nei bawk a, mahse Irish keeper Randolph bawk a paltlang thei lo.

Liverpool manager Jurgen Klopp chuan, "Benteke hian a career-ah hun duhawm lo tak a hmang mek a, a thawhrim lehzual a ngai a ni. Goal khung ngei a duh a, keinin goal khung turin kan mamawh bawk. Theihtawp kan chhuah chhunzawm zel ang," tiin a striker chungchang a sawi.

Benteke hian match 11 chhung chu a zawnin goal a khung ta lo a, heng match 11-ah hian goal khung tumin vawi 30 lai shot a nei a ni.

Chak loh kara lawmna

Liverpool-in chak result hlawh chhuak zo lo mah se lawmna tur an hmu a, rei tak hliam vanga a inkhelh theih loh hnuah Daniel Sturridge chu khelmual chhungah a inlan.

English striker hian An-field-a a hun hman tawha 55% chu hliam vangin khelmual pawnah a hun a hmang a, Upton Park-a minute 59-naa a tlan lut kha December thla tira a inkhelh hnua Reds tana a inlan lehna hmasa ber a ni.

Khelmual chhunga hun a hman chhungin England inter-national hi West Ham tan buaipui tam khawpin a khel a, hliam damkawr nichungin a thiam a la theihnghilh lo tih a lang.

Klopp-a thukhawchang

Liverpool manager Jurgen Klopp chuan, "Team ṭha zawk kan ni a, chance tam tak insiamin football hmuhnawm tak kan khel. A pawi ber erawh kan chance neih kan chhawr lo kha a ni. Ogbonna-a'n an chakna goal a khungna tura free-kick kha awm lo takin referee-in a pe a, ka ennawn leh ang," tiin chak lo mah se a naute khelh danah a lawm.