David Silva-a'n Lazio a zawm dawn

Spanish midfielder David Silva-a'n tun season zawhah kum 10 chhung a khelh tawhna Manchester City a chhuahsan dawn a, Lazio zawm tura ngaih a ni.

Kum 34 mi Silva hian kum nga dang a khelh theih a la inbeisei a, Italian club hian contract rei zawk an pe thei dawn. Spanish midfielder hian player ṭha tamna Manchester City tan Premier League match 27-ah a la inlan thei a, goal ruk a khung bawk avangin Lazio tan chuan a la awhawm hle.

Valencia aṭanga inzir chhuak Silva hian Premier League bika a match hnuhnung ber a khel tawh a, Manchester City nen hian Champions League nomawi chawi chunga inṭhen chu a duhthusam a ni. Pep Guardiola hoten Inrinni zan dar 12:30 hian Champions League quarterfinal-ah Lyon an hmachhawn dawn.

Silva chuan, "Man City hian ka chungah zahna an lantir a, chu chu ka tana pawimawh ber chu a ni. Kei leh ka chhungte min ngai pawimawh a, kan chunga an ṭhatnaah hian ka lawm takzet. Supporter, club leh a hnathawk zawng zawng chungah lawmthu ka sawi a, City hi ka hre reng ang," tiin English club hi a thlah tawh.

Spanish midfielder nena sawi zawm Lazio hi Serie A-ah palina an ni a, season tharah Champions League an khel dawn. Italian club hian tun season-a Serie A ringawta goal 36 khung saktu Ciro Immobile an chelh theih hmel a, Fenerbache striker Vedat Muriqi chu pound maktaduai 14.4 (€16m) in an lalut fel hnai bawk.