A tawp khar ṭhat duhtu Thibaut Courtois

Chelsea keeper Thibaut Courtois chuan season duhawm lo tak an hman mek chu a tawpah tal ṭha taka khar a duh a, Champions League emaw FA Cup-ah emaw tal final luh a duh thu a sawi.

Premier League cham-pion Blues hian league title an hloh fel tawhah a ngaih theih a, Champions League last 16-ah karleh Tawhlehzan hian French club ṭha Paris St-Germain an hma-chhawn dawn a, hemi hnu hian FA Cup fifth round-ah Manchester City an hma-chhawn leh dawn bawk.

Blues keeper chuan, "Kan season duhawm lo tak hi a tawp khar ṭha tur chuan kan beiseina la neih FA Cup leh Champions League-a final luh hi a ni a, a pahniha kan thei lo a nih pawhin a engemaw zawkah tal kan lut thei a nih chuan a lawmawm ang," a ti.

Kartawp inkhelah Chelsea hian an mikhual Manchester United chu 1-1 in an inhnehtawk pui a, manager lailawk Guus Hiddink enkawlna hnuaiah la tlawm miah lo mah se a sang pali zinga tel phak beiseina an la nei phak chuang lo.

Blues hian league match 25 khelh tawh aṭangin point 30 an hlawh chhuak tawh a, table a palina dinhmun luahtu Man-chester City chu point 17 zetin an phak lo mek a ni.

Belgian international chuan, "League match khat lekah pawh hnehna kan chang lo a nih chuan a sang pali zinga tel beiseina a tlem zel a, season thara Champions League khelh beiseina pawh a tlahniam ve zel a ni," a ti.

Chelsea hian an match lehpek chu Inrinni hian an khel dawn a, table mawnglama talbuai mek Newcastle an hma-chhawn dawn a ni.