I League U18 champion AIFF Academy

Nimin khan AIFF Elite Academy-in V. Lalengzama leh Anirudh te goal hmangin TFA Academy 2-0 in an hneh a, Mizo pali telna team AIFF Elite Academy chu I League U18-ah kum zawnin an champion.

Howrah Stadium-a final khelh-ah AIFF Academy tan Zama leh Jerry te'n inkhel bul an ṭan a, Mizo rawlthar pahnih hi an khel
ṭha dun hle. Minute 22-na lekah Bethlehem rawlthar Jerry-a ball pek chu Anirudh-a'n keeper chauh a hmachhawn hnuah goal-ah a chantir a, minute li hnuah left back Jerry-a cross chu Zama'n goal-ah chantirin goal dang a luh belh tawh lo.

AIFF Academy hian nikum khan I League U18 nomawi hi an lo chawi tawh a, khami ṭum khan tuna Bengaluru player Daniel Lalhlimpuia leh Malsawmzuala bakah Aizawl FC player Lalramzauva te chu player pawimawh an ni.

Match zawng zawng khel kim vek Jerry chuan, "Goal khung lo mah ila tun tournament ka khelh danah ka lungawi hle. Match zawng zawng ṭha taka ka khelh theih chhan hi Pathian vang liau liau a ni. Kan team hian final round-ah goal khat chiah kan chhuah a, Kashmir laka kan goal chhun pawh hi keeper tihsual vang a ni a, defender-te'n tihsual kan nei lo," tiin Vanglaini palai a hrilh.

Semifinal leh final-a goal khung-tu Zama chuan, "Royal Wahingdoh Junior team tana ka khelh lai
aṭanga ka thawhrimhna kha tuna kan hlawhtlinna a ni. Match hmasa pahniha khelhna hmun ka chan loh hnuah Kashmir Lonestar kan hmachhawn ṭumin min khelh tir a, goal ka khung zarah final thlengin min hmang char char tawh a, coach-te rinna ka tih hlawhtlin theih avangin ka lawm hle a ni," tiin a sawi.

Lunglei rawlthar Edmund Lalrindika chuan, "Final-ah khel lo mah ila kan champion avangin ka lawm hle. Ka kawngah hliam ka nei a, first half-ah goal hnih kan khung tawh avang leh IFA Shield kan la khelh dawn bawk avangin ka ṭhu tluanah ka ngai. Kan hmabak inelnaah theihtawp ka chhuah zel ang," tiin a thawhrim tur thu a sawi.

Champhai rawlthar wing back Zonunmawia chuan, "Inelna ṭan hma aṭang khan kan champion hi ka ring a, ka beisei ang ngeiin kan champion. Tun tournament-ah ka khel tam tawk lo a, starting XI chang turin rim zawkin ka thawk ang," a ti,

I League U18-ah Mizo pali telna AIFF Academy an champion a, Mizo hlang awmna Aizawl FC erawh palinaah an lungawi a ṭul. Aizawl FC hian Thawhlehni khan pathumna inchuhnaah group stage-a an hneh tawh Goan club Salgaocar lakah 1-3 in an tlawm.