Mizoram khingpui tur Dadra and Nagar Haveli and Daman and Diu
National Football Championship for Santosh Trophy-ah vawiin tlai dar 3:30 hian Mizoram chuan Dadra and Nagar Haveli and Daman and Diu an hmachhawn dawn. Lalsangzuala Hmar hote hian match hmasa bera Services an hneh loh avangin an chak zo lo a nih chuan final round beiseina a tawp ang.
Mizoram hi group E-ah Services, Sikkim, Uttarakhand, Pondicherry leh DNH & DD te nen an awm ho. Group stage-ah hian team 35 chu group parukah ṭhen darh an ni a, group tina pakhatna bakah pahnihna ti ṭha pathumin final round an khel dawn.
Goal a pawimawh
Mizoramin an elpui ber Services an hneh tak si loh avangin pahnih tiṭha zinga tel an tum dawn a, chumi tur chuan chak vek bakah goal khung tam a pawimawh.
Mizoram striker Lalkhawpuimawia (Mapuia) hian MPL10-ah goal thum a khung tawh a, Services lakah goal a khung nghal. DNH & DD lakah Mapuia bakah a thlawptu Vanlalthanga leh Laltlanzova ten goal an khung theih a pawimawh dawn.
Services lakah midfielder an chefuh tawk lo a, hei bakah hian team pahnih an inan loh avangin coach Lalsangzuala'n player thlan dan a thlak a rinawm. Punjab-ah ruah a sur leh ṭhin a, Mizoramin game ṭha zawk an khelh theih nan khua a ro ṭhat a pawimawh.
Mizo player tan phaitual hnima inkhelh hrim hrim a harsa lo a, amaherawhchu ruahsur leh dai vanga ground a nal a nih chuan ball boot-ah 'changer' neih a pawimawh. Artificial turf-a match tam zawk khel ṭhin Mizo player tan ball boot hling sang (changer) lei hi a la harsa a, Mizoram player tam zawkin an nei lo. Inelna neihna hmun Punjab-ah khua ṭha se tih hi Mizoram team tana duhthusam a ni
DNH & DD chu
Dadra and Nagar Haveli and Daman and Diu hi Union Territory an ni a, India khawthlang lama awm a ni. Dadra, Nagar Haveli, Daman leh thliarkar Diu te hi a hrang vek.
State atana Goa puan a nih hma khan an khawpui chu Panjim, Goa a ni. Tunah chuan capital atan Daman an hmang.
Nikum khan DND & DH hian group stage match nga an khelhah point an hmu lo. West Bengal laka goal nga an chhuah chu an goal chhuah tam ber a ni a, match hmasa bera Chattisgarh nen an inkhelh ṭunah erawh goal hnih chauh an chhuah.
Kuminah DND & DH an insiamṭha hret a, an khelh danah goal venhim an zir nasa tih a lang. DND & DH hian Pondicherry lakah goal khung hmasain halftime hmain penalty an chawi bakah player pakhat an chân. Minute 45 chhung player 10-a khel chungin Pondicherry an chelh a, Mizoram an hmachhawn hunah tlarhnungah 'bus' an 'park' ang.
Mizoram tan
Mizoram coach Lalsangzuala Hmar chuan, "Arunachal Pradesh (final round khelhna tur) a zin hi kan la beisei reng. Kan thawkrimah kan ngai a, mah se kan la thawkrim tawk lo a ni tih kan khelh dan leh kan result-ah a lang. Kan hun neih tlemtêah hian a hma aia nasain hna kan thawh a ṭul a ni," tiin Vanglaini a hrilh.
Sanga chuan sawi chhunzawmin, "Team nem deuh an awm thei a, mahse keini tan chuan final ang vek a ni. Eng team mah kan dah hniam thei tawh lo a, kan khingpui apiang hneh thei turin kan inpeih a ngai," tiin a sawi.
Mizoram coach K. Lalenghluna (Maenga) chuan, "Chawlh hmanga kal kan ni lo a, hei vang hian player-te hian match leh training tur bakin hotel an chhuahsan hi a rem lo. Beiseina a la awm chhung chuan kan theihna zawng zawngin Mizoram tan kan khel tur a ni," tiin Vanglaini a hrilh.
Group E inkhel dangah Sikkim leh Services an inkhel dawn a, Uttarakhand leh Pondicherry te an inkhel bawk ang.