England tan Italy hneh a tawk

Euro 2024 khel turin a thlengtu Germany, Belgium, France, Portugal, Spain, Scotland leh Turkey an tling tawh a, England tan ram pasarih hnung zui turin zanin dar 12:15-a Italy hneh a tawk.

Mahse, han chhiar nawn teh - "Hneh a tawk" kan tih hi 'Italy' an ni a, vawi khat chak hi England tan a harsa dawn tih a chiang a, a tiharsa zual turin Italy hian Euro 2024 khelh beiseina chhi nung turin chak an mamawh.

A tawi zawnga sawi chuan Wembley Stadium-ah football ram ropui pahnih an intawng dawn a, a hmuhnawm dawn. Three Lions hian match ngaah tlawm la nei loin vawi li an chak a, vawi khat draw an nei.

Italy erawh match nga an khelhah point 10 an nei a, vawi thum an chak - vawi khat draw leh vawi khat tlawm an nei a, point thumin England an phak lo. An hnuaiah point 10 tho nei Ukraine an awm a, match khatin khel tlem zawk mah se England laka tlawm hi an tan a pawi thei ang.

Phuba chu

Euro 2020 final-ah khan Italy leh England hi an lo intawng tawh a, an intawnna hmun hi zanina an khelhna tur Wembley Stadium hi a ni - minute 120 chhunga 1-1 a nih hnuin penalty-ah Italy an chak a, England an vel ṭap.

Zaninah Wembley Stadium-ah ngei team pahnih an intawng leh dawn a, England fan-ten Italy beiseina tikhawtlaitu nih a, an hmai hma ngeia Euro 2024 khel tura an tlin lawm an châk khawp ang tih a chiang.

Mahse, England keeper Jordan Pickford chuan, "Kan inkhel tur hi phuba tih lam a ni lo. Khualmuala rei tak kan hneh loh hnuah Italy hi kan lo hneh tawh a, khami ang khan tun hi game dang a ni leh mai. Manager thar neiin, an khel ṭha êm êm a, team ṭha an ni tih kan hria.

"Kan tum ber chu Germany-a zin ve theih a ni a, hnehna chan tumin kan bei ang," a ti a, phuba lamin an rilru a luah loh thu a sawi - England hian tun qualifier-ah Italy hi khualmualah 2-1 in an lo hneh tawh.

Hey Jude

Euro 2020 final leh tun hian danglamna lian tak a nei - chu chu England-in tun dinhmuna khawvel player ṭha ber ang hiala tam takin an ngaih Jude Bellingham an neih hi a ni a, Real Madrid midfielder hi danglamna thlen turin a ṭha tawk.

Wembley Stadium-a final-ah khan Bellingham hi squad-ah awm tawh mah se top flight league-ah season khat chauh a la khel a, bench lamah a awm tluan - tun angin a la puitling tawk lo a, a la ropui tawk lo.

Mahse, tunah chuan Real tan meuh innghahna a ni a, Spanish club tan hian match 10 a khelhah goal 10 a khung tawh - a che vel a hmuhnawm a, goal a khungin ropui taka khung a nei fo bawk.

England full back Kieran Trippier chuan, "Team pahnih inkara danglamna thlen thei tur khawpin a ṭha tawk. Kum naupang tê ni chungin a puitling êm êm a, a thiamna leh huaisenna te hi thlir teh u, a mak zawk a ni," a ti.

England an ṭha

Three Lions tan Pickford chu si ban nghak leh tura ngaih a ni a, top team inti tana Pickford hman reng hi a fuh em, tih chu zawhna awm thei tak a ni. Tlarhnungah Trippier, Kyle Walker, John Stones leh Harry Maguire te bul ṭan tura beisei an ni.

England boss Gareth Southgate-a'n Kalvin Phillips aiah Trent Alexander-Arnold chu Declan Rice nena inkawp turin a rin leh mai a rinawm a, Bellingham che tla vel mawlh hi en châkawm tawh a ni bawk.

Goal nawr turin Phil Foden leh Marcus Rashford an awm thei ang a, Bundesliga lama tlangnel nghal Harry Kane pawh rintlak leh viau tura ngaih a ni.

Three Lions hian Italy hneh tur khawpin squad an nei ṭha tawk a, match hnih khelh hmabak la nei chunga Euro 2024 inpetkai turin an ṭha tawk - Southgate hian a hmanrua a hmang thiam ang em, tih chu zawhna zawk a ni.

Hei le Italy

England leilunga European champion nihpuitu Roberto Mancini nen an inṭhen hnuah Italy-in Luciano Spalletti an la lut a, Serie A-a Napoli champion puitu hi a hnathawh ṭhat leh ṭhat loh sawi nan chuan a la hma hret - match thum a kaihhruai tawhah an la tlawm lo.

Match hnihah an chak a, match khatah draw result an nei - match hnuhnung berah Malta chu 4-0 in an sawp a, hemi hma hian Ukraine chu 2-1 a hnehin, North Macedonia (1-1) chu an inhnehtawkpui thung.

Spalletti hnuaiah Azzurri hian 'top team' tia chhal tur an la tawng lo a, zanin hi Italian coach tan fiahna tia sawi theih a ni. Italy hian goal veng tura Gianluigi Donnarumma an neih avangin si ban nghak chu an nei ṭha zawk chiang a, tlarhnunga Giovanni Di Lorenzo, Federico Dimarco, Gianluca Mancini leh Alessandro Bastoni te pawh an ṭha tawk.

Chutihrual chuan mimal buaina avanga midfielder Sandro Tonali chhawr theih loh hi a pawi thui thei a, tlarhmaa Napoli striker Giacomo Raspadori, Juventus forward Moise Kean leh Sassuolo forward Domenico Berardi te hi an bu zawla England luhchhuah turin an ṭha tawk em, tih pawh zawhna awm thei a ni.