Messi dinhmun a la chiang lo

South America ramten World Cup qualifier an khelh laiah Nilaini zing dar 7:30 hian Argentina chuan Peru an lenchilh dawn a, world champion tan Lionel Messi chuan inkhel bul a ṭan thei dawn nge dawn lo a la chiang lo a ni.

Argentina hian an match hnuhnung zawkah Paraguay an hneh a, goal awmchhun chu defender Nicolas Otamendi khung a ni. Messi chu bench lamah dah hmasak a ni a, khelmual a luh hnuah goal ban leh bar pet per mah se a vannei ta lo.

Inter Miami forward hi ram tana a feh chhuah hmasak zawk khan a hliam a, club tan match khel thei loin a awm reng. Mahse, hliam damkawr ni chungin Argentina tan a zin chhuak leh a, tun ṭumah pawh hian minute 90 a khel lo a nih pawhin a hmel erawh a inlan ngei a rinawm.

Lionel Scaloni enkawl Argentina hian Pathianni khan training an nei a, an training-ah hian Messi hian a ṭhiante training pangngai a zawm lo. Mimalin inbuatsaihna erawh a nei tho a, a ka ding lam hliam chu 100% a dam a la ni lo tihna a ni.

Argentina hmachhawn tur Peru hian match vawi thum an khelh aṭangin point khat chauh an la hmu a, an dinhnun a ṭha lo. World Cup 2026 khel phak tur chuan insiamṭhat an mamawh hle.

Peru player leh coach ni bawk Juan Reynoso chuan, "Kan match hmasa lamah kan khel ṭha ṭhin a, mahse kan chak thei lo. Mawi tak leh hmuhnawm taka khelh ringawtin World Cup min hruai thleng dawn lo tih kan hriat a ngai.

"Chuvangin Argentina nen kan inkhel tur hi a pawimawh takzet a, point hmuh ngei tumin kan bei dawn a ni. Player zawng zawng pawh kawng hrang hranga lo insiamrem nghal zung zung thei turin ka beisei," tiin an khelh dan kalhmang thlak a tum.

Inkhel dangah Brazil chuan Uruguay an lenchilh dawn bawk. World champion vawi nga ni tawh Brazil hi Venezuela nen 1-1 a inhnehtawk hlim an ni a, hun tawp dawn lama an goal chhuah avangin point hnih an hloh.

Brazil coach Fernando Diniz chuan point hloh loh an tum tih a sawi a, ram tana goal khung hnem ber Neymar (79 goals) pawhin goal tam zawk khung an tum tih a sawi bawk - world champion hmasa ber Uruguay tlarhnung tan fimkhur a ngai dawn.

Uruguay hian World Cup qualifier bikah kum 2001 aṭang khan Brazil hi an la hneh leh ngai lo. Captain Federico Valverde chuan chak ngei an tum tih a sawi a, Real Madrid tana a khelh pui Vinicius Junior leh Rodrygo te hneh ngei a tum.

Valverde chuan, "Colombia nen 2-2 a kan inhnehtawkna kha en let ila, chak thei tur kan ni. Chuvangin Brazil lakah hian fimkhur taka kan khelh a ngai dawn, result ṭha kan neih ngei pawh ka beisei," a ti.

Uruguay hi Marcelo Bielsa-a enkawl an ni a, Argentine manager hian tlarhma lama chhawr turin Liverpool forward Darwin Nunez a nei - attacking game khel ṭhin an ni bawk a, inkhel hmuhnawm an chhawpchhuah ngei a rinawm.