Sanghai Masters champion Hurkacz

Pathianni zana khelh zawh tak Rolex Shanghai Masters-ah Hubert Hurkacz a champion. Hurkacz hian ATP Masters 1000 title a lak vawi hnihna ni turin Andrey Rublev chu 6-3, 3-6, 7-6(8) in a hneh a ni.

Kum 26 mi Hurkacz-a hi awlsam taka chak a ni bik lo, set hnuhnung ber an khelh lai hian 6-5 in a hniam zawk, mahse tie break an khelh hnuin a vannei zawkah a ṭang - player pahnih hian a vawi hnih nan ATP Masters 1000 title an beisei ve ve a, a tawpah Hurkacz a vannei ta zawk.

Polish tlangval Hubert Hurkacz chuan, "Match point ka neih hmasakah Andrey khan service ṭha lutuk a rawn nei a, a hnuah match point a nei ve zui, a nihna takah chuan inkhel hautak leh zamawm ve tak chu a ni chiang.

"Andrey khan a khel ṭha êm êm a, kei chu a tam zawkah chuan ka lo inveng hram hram a ni. Tournament danglam leh hlu tak, hnam chin dan phung lan nasatna hmuna ka vannei thei hi ka lawm," tiin a sawi.

Chak lo zawk Rublev tan a uiawm ang. Russian tlangval hian set hloh miah loin final a lut thei a, tun hma lamin ATP Tour bika final a khelh hmasak pariat zinga pasarih zetah chak thei mah se tun ṭum chu a vanduai ni a tawng.

Tennis season a zo hnai a, season tawpa a thiam pariat inelna ATP Finals khel tur pawh an inzum zel. Pariat inlan thei tur zingah Rublev hi point hmu sang pangana a ni mek - Hurkacz erawh 11-naah a la awm a, a hmaa awm Holger Rune a phak lohna chu point 335 a ni mek.

Sanghai Masters zo chiah mah se Asia rama tennis inelna an la nei chhunzawm zel. Nimin khan Japan Open khelh niin, player langsar zinga mi Alexander Zverev chu world number 60 Jordan Thompson hneh loin a zinkawng a tawp nghal.

Tokyo khawpuia inkhelah German tlangval Zverev hian Thompson chu 6-3, 6-4 in a ngam lo. Thla hmasa lawka China Open champion Zverev chuan, "Engkim mai kha a fuh lo vek, ka khelh chhiat dan kha sawifiah mai pawh a harsa," a ti a, a khingpui a khelh ṭhat thu a sawi bawk.