Tyson-a 'comeback' fight an sawn hla

World heavyweight champion hlui Mike Tyson chuan September 12-ah ring chhung lut tura a lo kir leh tur thu sawi mah se Roy Jones Jr. nena exhibition bout an neih tur hi November 28 atan sawn a ni. 

Kum 54 mi Tyson-a hmachhawn tur Roy Jones Jr. hi weight division palia world champion lo ni tawh a ni a, California State Athletic Commission phalna hnuaia inhnek tur hi Las Vegas khawpuiah nghah a ni dawn. 

Mahse, a hun hmasa Sepetmber 12 chu November 28-ah sawn a ni ta a, US lama 'thanksgiving day' hman zawh hlim a nih dawn avangin inhnek entu an tam theih zawk beisei a ni. Tyson chuan, "Inhnek hun kan thlak avang hian boxing chanchina comeback ropui ber pawl en turin mipui tam takin hun an neih theih phah dawn a ni," a ti a, Thanksgiving day hi kumtinin November kar linaa Ninganiah lawm ṭhin a ni a, US leh Canada-ah chuan sorkar chawlh niin kuminah chuan November 26 a ni. 

American fighter Tyson-a'n inhnek a hmachhawn hnuhnung ber chu kum 2005 kha a ni a, Irish boxer naran tak Kevin McBride lakah tlawmin inhnek a hmachhawn vawi 58-a a vawi ruk tlawmna a ni. 

Tyson ang thoa American boxer Jones hi kum 51 mi a ni a, February 2018-a  Scott Sigmon a hneh hnuah a inhnek leh tawh lo. Boxer pahnih hi round riat chhung an inhnek dawn a, pay-per-view hmangin pekchhuah a ni ang.