Olympic 2028-ah cricket tel dawn

Kum 1900 hnua a tel lehna hmasa ber ni turin Cricket chu Olympic 2028-ah khelh a ni dawn a, he thutlukna hi Thawhṭannia Mumbai khawpuia International Olympic Committee (IOC) member ṭhukhawm chuan an pawm a ni - member zinga pahnih chiahin cricket telh hi an duh lo.

Los Angeles-in kum 2028-a a thlen tur inelnaah hian Flag football, squash, lacrosse leh baseball/softball te chu infiamna telh thar tur an ni dawn bawk.

Flag football hi American football chi khat, mahse, non-contact niin, Olympic-a telh a nih vawi khatna tur a ni a, player panga ve ve awma inelna a ni - squash pawh Olympic-a telh a nih vawi khatna a ni a, lacrosse erawh vawi rukna tur niin kum 1908 hnua medal hlawhchhuah theiha telh a nih vawi khatna tur a ni thung.

Baseball hi Barcelona 1992-ah khan telh a lo ni tawh a, softball chu a hnu kum lina, Atlanta 1996-ah khan telh a ni - softball hi hmeichhiain an khelh ṭhin, 'hmeichhe baseball' tia sawi theih a ni a, hei vang hian infiama pahnih hi huang khatah baseball/softball tia dah a ni.

Cricket bikah hian team paruk tel turin LA Games organiser-te chuan rawtna an thlen a, mahse, team tel tur zat leh an qualify dan tur chungchangah hian thutlukna siam a la ni lo - inelna hi Twenty20-a khelh tur niin, mipa leh hmeichhe inelna awm tura beisei a ni.

Olympic & Paralympic Games 2028 sports director Niccolo Campriani chuan, "Khawvel infiamnaa lar ber pahnihna hi kan lo lawm a ni," tiin Los Angeles-a cricket inelna a tel tur chu an lawm thu a sawi.