Silly Point: INDIA 8-0 PAKISTAN

ICC World Cup history a, Pakistan laka hneh theih loh nun an neihna chu la chhawmnung zelin, Hamara Desh chuan awlsam takin Pakistan chu an sawp a. Infiamna khawvelin boruak an vaw 'hot' viau nangin, a inkhel erawh a kal khat ta deuh a. High Sikul leh Primary Sikul zirlai intum ang vel lekah a chang zo ta ni.

Thlirletna

Ṭhumvawra vanneih hnuah Rohit Sharma-a'n vawm hmasak a thlang kha hrethiam turin Rocket scientist nih a ngai lo a. Chiangsa a ni. Over 30-na thleng kha chuan Pakistan batting kha a kal tluang pangai a, Silly Point hmanga kan kaihharh leh taka kan lo ngaih hman kaptan Babar Azam-a'n half century a siam zawh chiah hnua a dinpui pa Mohammed Rizwan nen India lam Mohammed ve thung Siraj-a'n a vawm hlum aṭang khan Pakistan chet chiatna bul inṭanna a ni ta a. Thawklehkhata cyclone na takin rampalailenga rapin chhawlbuk ram tawh lampang a nuai darh ta chiam mai ang lek a ni a. An over 50 pawh hmang zo loin run 191 chiah an ngah thei a. India Batting line up han cho tur chuan a tlem lua a ni e.

Kaptan Rohit Sharma-a'n tun World Cup bikah a zawnin half century a siam ta a, run 14 lekin century a vaw chhuak lo tihah Shaeen Afridi-a'n a vawm hlum a, Pavilion lam a letna lama, Ahmedabad Modi Stadium a entu mipui nuai chungin kut benga standing ovation an pe erawh, a damchhunga a theihnghilh tawh loh tur thil tawn a ni ve ngei ang. Rohit Sharma a out meuh kha chuan, inkhel kha India kutah a awm vek tawh kan ti thei mai awm e.

Knockout tournament rei leh inkhel tamnaah hi chuan, a hun taka team anga vawrtawp thlen hi a pawimawh ṭhin a, Saipui kal lai ang maiin Indian team hi an kal ngaih ngaih hrih a, a tira top gear-a tlan nghal, a tawp lama petrol tlan kang ta si an ni em lo turah dah i la. Champion tura rinkai ber khawsakzia erawhin an la khawsa hrih zel e.

Barakhaih

Infiamna khawvelin a ken tel 'Barakhaih' chu Pathianni khan kan hmu a. Afghanistan-in champion lai leh nomawi humhim tum England an hneh mai ni loin, an sawp a ni.

Zep thu a cheng lo, England khan an powerplay an hmang ṭha lo a, tin, tun World Cup-ah hian an ball vawm department te an la hlauhawm tawk lo. An ram England sik leh sa leh pitch-ah chuan tawrhlelhawm tak tur si, sub continent pitch leh khaw awmdan atan erawh bowling hlauhawm an ni pha lo tlat a ni e. Insiamṭha thei tak maw?

Tlipna

League stage round 9 inkhel turah a round 3 na chu kan lo zo fel leh ta der mai a. Team tin ruangam leh dinhmun diktak kan hmu ṭan a. Tun chinah hrih chuan, Bharat Team te hi Champion tura mit la ber chu an ni nameuh mai, mahse knockout tournament a ni tlat. Eng pawh thleng thei a ni!