Afghanistan lakah England an tlawm!

Pathianni khan Cricket World Cup-ah thilmak a thleng a, Afghanistan chuan champion lai England chu run 69-in an hneh - England hi match thum an khelh tawha vawi hnih an tlawmna a ni a, champion nomawi humhim turin hmabak a ko ta hle.

Arun Jaitley Stadium, Delhi-a inkhelah England hi ṭhumvawrah an vannei zawk a, vawm hmasak an thlang. Mahse, an beisei ang ngawtin thil a kal lo hle - Afghanistan tan Rahmanullah Gurbaz chuan ball 57 lekah run 80 ngawt a vaw chhuak a, run 58 zet siamtu Ikram Alikhil chuan a pui ṭha viau bawk.

Afghanistan hian over 49.5-ah wicket hloh vek mah se run 284 an siam hman a, beiseina an nei. Chutihrual chuan team pahnih intawnna hi batter tana khelmual nuam bik a ni a, England fan-ten beiseina an nei.

Mahse, an beisei ang erawhin thil a kal lo chiang hle. Opener Jonny Bairstow chuan run hnih lek a siam hman tihin a out nghal a, England batter zingah run 66 siamtu Harry Brook tih loh chu run 50 vaw tling an awm lo!

England hian over 40.3 bak an tlin lo a, run 215 chiah siamin an out vek - Afghanistan tan run 37 lek pe chunga wicket thum latu Rashid Khan leh run 51 pea wicket thum tho latu Mujeeb Ur Rahman te chu fak tlak an ni.

Afghanistan-in tun World Cup match thum an khelha an chak vawi khatna a ni a, Bangladesh leh India laka tlawm tawh team hian champion lai an hneh miau avangin beiseina an nei thar ang.