Senegal leh Cameroon an awm dun

Africa Cup of Nations 2023 khelh dan tur a hriat tawh a, champion lai Senegal leh team ṭha Cameroon te chu group C-ah an awm dun - anni pahnih bakah hian Guinea leh Gambia te an awm bawk.

Senegal forward Sadio Mane chuan, "Kan awmna group chu a awlsam dawn lo hle. Cameroon hi elpui hautak tak an ni dawn a, chutihrualin keini pawh team ṭha ve tho kan ni a, inelna hautak leh hmuhnawm tak a ni ngei ang," tiin a sawi.

World Cup semifinalist Morocco chu group F-ah DR Congo, Zambia leh Tanzania te nen an awmkhawm. FIFA world ranking-ah Morocco hi 13-na an ni mek a, nakkuma neih tur Africa Cup of Nations atana ranking sang ber an ni ang.

AFCON Team of the Tournament zinga tel Achraf Hakimi chuan, "World Cup-ah zinkawng ngaihnawm tak kan nei tawh a, khatiang bawk kha AFCON lamah pawh kan beisei leh ang. Group khatah team ṭha tak tak kan awm khawm a, a sang ber nih kan tum dawn a ni," a ti.

Group ngaihven hlawh tur zinga mi chu group A a ni. A thlengtu Ivory Coast chu Nigeria nen an awmdun. Kum 1992 leh 2015 AFCON champion Ivory Coast hian an match hmasa ber atan nakkum January 13 hian Guinea-Bissau an tum ang.

Team 24 telna tur AFCON Cup 2023 hi June leh July thlaa khelh turin ruahman hmasak a ni a, mahse a khelh hun pangngaiah an khel leh dawn ta zawk. Nakkum January 13 aṭanga February 11 chhungin Ivory Coast-ah an khel dawn a ni.

Africa Cup of Nations 2023 draw:

Group A: Ivory Coast, Nigeria, Equatorial Guinea, Guinea-Bissau.

Group B: Egypt, Ghana, Cape Verde, Mozambique.

Group C: Senegal, Cameroon, Guinea, The Gambia.

Group D: Algeria, Burkina Faso, Mauritania, Angola.

Group E: Tunisia, Mali, South Africa, Namibia.

Group F: Morocco, DR Congo, Zambia, Tanzania