Spain-in Haaland-a telna Norway an vel

Euro 2024 khel turin Spain an inpettling a, an kalkawnga an hneh chu Erling Haaland-a telna Norway an ni - Thawhṭanni zan khan Gavi goal hmangin Spain hian 1-0 in hnehna an chang a, match hnih khelh tur la awm mah se Euro 2024 khel turin an tling chiang.

Spain-in hnehna an chan avangin group A-a awm ve tho Scotland pawh Euro khel turin an tling ve nghal a, Spain nen hian point 15 ve ve an nei - match khat chiah khelh tur nei tawh Norway tan team pahnih um phak ngaihna a awm tawh lo.

Euro 2000 hnua major tournament khel leh tawh lo Norway tan result duhawm lo a ni a, nakkuma khelh tur Germany-a inelna hmachhawn tur chuan Nations League ranking kaltlanga playoff khelh chu an beisei theih chhun a ni tawh.

Haaland a reh

Spain coach Luis de la Fuente-a'n 4-3-3 formation hmangin Spain a rem a, tlarhnungah Real Madrid left back Fran García, Al Nassr centre back Aymeric Laporte, Real Sociedad centre back Robin Le Normand leh Real right back Dani Carvajal te an inkawp.

Midfield aṭanga tlarhnung pui turin Manchester City chhuanvawr Rodri a awm bawk a, Spanish football team hian City striker hriam Haaland an dah ṭha hneh hle - kum 23 mi striker hian goal a hnim hnai meuh lo!

Inkhelh chhung zawngin Norway hian 33% ball an chang a, vawi nga chiah shot an nei - heng zinga pahnih chiah hi target-ah a kal a, Spain tan Norway an la nau hret.

Morata a chesual

La Roja hian minute 20-na lekah goal hmahruai an khungah an inngai a, mahse, Stefan Strandberg ball pet sual Alvaro Morata-a'n goal line aṭanga a pet luh chu offside vangin pawmsak an ni lo - Norway an thaw huai.

Morata hi inrawlh lo se goal hi an pawm a rinawm - Carvajal chuan Brighton & Hove Albion winger Ansu Fati tan ball a thlawh lut a, hemi lo petchhuah tumtu Strandberg chuan an goal lamah a pet phei.

Atletico striker Morata hi inrawlh lo ta se, goal tho tur niin a lang. Mahse, 'striker' rilru takin Morata hian a pet goal a, a lo offside si avangin pawm a ni ta lo.

Hei le Gavi

First half chhungin goal a lut lo - Spain mipui chauh ni lo, Scotland pawhin hlauhthawngin inkhel hi an lo en. A chhan maw? An elpui Spain hi an chak chuan an pahnihin Euro 2024-ah an tling chiang dawn tih an hriat vang a ni.

Second half ṭan aṭanga minute linaah Spain leh Scotland mipuiten an duh an hmu ta nge nge a, Mikel Oyarzabal-a shot let lehlam chu Gavi chuan inkhela goal awmchhun ni turin a khung - kum 19 mi midfielder hian ram tan goal nga a khung der tawh.

Barcelona midfielder Gavi hian Spain tan match 25 a khel tling ta der a, a kum zat ngaihtuahin ram tana a sulhnu hi a ropui hle. Barca tan pawh match 107 khel tawhin, goal sarih a khung tawh bawk.

A chheh vel

Norway hian chance nei lo tawp chu an ni bik lo. Arsenal captain Martin Odegaard chuan a chance neih a chhawr lo a, rawlthar beiseiawm Antonio Nusa chance erawh Spain goalkeeper Unai Simon tan lu tihai a tling phak lo.

Spain tan season duhawm tak hmangtu Morata chuan goal khungna remchang a nei a, mahse, kum 30 mi striker shot chu goal line aṭangin petchhuah hman a ni.

Spain-in tun international break-ah match khelh tur an nei tawh lo a, anmahni ang thoa Euro khel tura tling Scotland erawhin zanin dar 12:30 hian France nen friendly match an khel ang.