Korea Open champion Pegula

Hmeichhe tennis inelna Korea Open chu nimin chhun khan Seoul khawpuiah khelh a ni a, inkhel hmuhnawm takah Jessica Pegula chuan Yue Yuan hnehin a champion.

Seeded pakhatna Pegula hian tun season chhunga a nomawi pahnihna ni turin, a khingpui Chinese nula hi 6-2, 6-3 in a hneh. Set hnih an khelh laiin chet buai êm êm a nei lo a, chutihrualin awlsam leh nuamsa taka chak erawh a ni bik lo.

Kum 29 mi Pegula chuan, "Ka nu hi Korean mi a ni a, chuvangin ka tan chuan Korean Open hi a hlu hle. Tun hnai chu ka ranking a che nasa hle a, hniam deuh leh han san ve deuh lai pawh ka nei, chutiang kara hlawhtlinna ka chang thei hi ka lawm," a ti.

World number 4 Pegula hian August thla khan Montreal-ah Canadian Open nomawi a lo chawi tawh bawk, tun season chhungin Doha leh Tokyo khawpuiah final a thleng bawk.

Asia rama tennis inelna dang Hong Kong Open-ah Leylah Fernandez chuan Katerina Siniakova lakah 3-6, 6-4, 6-4 in hnehna a chang a, tun season chhunga a vawi khat nan WTA title a la - kum 2022 March thla hnua a champion lehna hmasa ber a ni hial.

Kum 21 mi Fernandez-i hi tournament khelh dawn kha chuan world number 60 a ni a, a champion tak avang hian ranking chhuak tharah chuan a sang zual 50 zingah a tel phak tawh ang.