Leeds an thiam nge Man City an ṭha lo? Guardiola hoten point 5 an hloh tawh

Elland Road-ah Leeds United leh Manchester City ten inkhel hmuhnawm an lantir a, Inrinni zan khan 1-1 in an inhnehtawk. Man City tan Raheem Sterling-a'n minute 17-naah goal hmahruai a khung a, Leeds United substitute Rodrigo-a'n minute 59-naah siphurh a sut. 

Pep Guardiola hoten Premier League match thum an khelh tawh aṭangin point li chauh an la hmu a, Elland Road-a an result aṭanga teh chuan Man City-in insiamṭhat aiin tlakhniam lam an pan niin a lang. Chutihrualin football ngainatute erawh Spanish manager Pep leh a mi ngaihsan Marcelo Bielsa ten an naute an khelhtir danah an lungawi khawp ang.

Leeds United-in Manchester City meuh mikhual mah se attacking game an khel ngam a, amaherawhchu Pep Guardiola hoten inkhel an thunun nghal avangin goal luh tam beiseina a lian nghal hle.

City captain Kevin de Bruyne-a'n freekick aṭangin goal ban a pet per a, Ferran Torres-a'n goal khungna hun ṭha a hlah. Minute 17-naah Raheem Sterling-a'n a petna tur khawp insiamin ṭha zetin a pet goal a, Leeds keeper Illan Meslier tan dan rual a ni lo.

Man City an che ṭha a, Leeds manager Bielsa-a'n insiamṭhat a mamawh tih hriain an khelh dan chu 4-1-4-1 aṭangin 4-3-3 formation-ah a thlak a, hmasawnna hmuh tur a awm. 

Wing back Stuart Dallas-a'n goal khung theihna hun ṭha a nei a, keeper Ederson-a'n a dang ṭha hle. Man City defender Benjamin Mendy tihsual zarah Luke Ayling-a'n chance a insiam a, Ederson bawkin Man City a chhan.

Leeds United-in first half tawp lama an insiamṭhatna chu second half-ah an chhunzawm a, bench aṭanga rawn lut Ian Poveda leh Rodrigo te chu Man City defender tan an hnawksak.

Valencia aṭanga Leeds zawmtu Rodrigo-a'n crossbar a pet per a, Spanish forward hian minute 59-naah goal a khung zui. Corner aṭanga ball kal Ederson-a'n hnek chhuak sualin Mendy a per hnuah Rodrigo zawnah a tla fuh a, Leeds forward-in siphurh sut nan a hmang.

Leeds bawkin goal khungna chance an nei a, Rodrigo ball tauh chu Ederson-a'n a dang ṭha hle. Man City forward Sterling pawhin solo goal khung theihna nei mah se ball a keng rei hret a, keeper Meslier-a'n a dansak.

English forward Sterling hian Liam Cooper lakah penalty hmuh a inbeisei a, VAR hmanga enlet hnuah penalty pek a ni lo. Leeds leh Man City an inhnehtawk a, Bielsa hote statistics-ah an che ṭha zawk.

Leeds-in 52.4% ball possession an nei a, Liverpool (51.2%), Fulham (50.3%) leh Sheff Utd (63.7%) an hmachhawn ṭum pawhin ball an chang tam vek. Bielsa hote hian vawi 356 pass dik neiin Man City (319) aiin vawi 37-in pass dik an ngah zawk. 

Bielsa hote hian goal zawnah vawi sarih an pet thei a, Man City-in vawi hnih chiah goal zawnah an pet. Player neih dan thlirin Man City-in point hnih an hloh a, statistics aṭanga teh erawh chuan Leeds zawk hi point hlohtu zawk an ni.

Leeds manager Marcelo Bielsa chuan, "Inkhelh ṭantirh leh tawp lamah Man City an chungnung a, first half tawp leh second half tirah kan che ṭha hret thung. Anni tan chuan keini laka a chungnung zawk nih hi thil harsa a ni lo a, keini tan erawh kan theihna zawng zawng chhuah a ngai thung.

"Chak ta ila Man City lam tan chuan pawm thiam a har ang. Chutihrualin chak thei dinhmunah kan ding a, chak erawh kan phu chiah lo," tiin tawi fel takin inkhelh dan a sawifiah. Championship champion Leeds United hian match li khelh aṭangin point sarih an hmu a, Premier League ti hmuhnawmtu an ni chhunzawm zel ang.

Manchester City-in Covid-19 leh hliam vangin tun hma an la pha lo hle. Pep Guardiola-a'n hliam vangin Sergio Aguero leh Gabriel Jesus te a chhawr thei lo a, coronavirus positive vangin Riyad Mahrez, Aymeric Laporte leh Ilkay Gundogan ten training an zawm tlai.

Pep Guardiola-a'n tlarhnung thuam chak nan Napoli defender Kalidou Koulibaly lakluh an duh a, Nathan Ake erawh a ṭha nghah nana lak a ni. Koulibaly an lak theih tak loh avangin Ruben Dias an lalut a, pound maktaduai 65 man defender hian bul a ṭan nghal a, fak chiam tur erawh a la ni lo.

Spanish manager Guardiola chuan, "Mipui chuan hnehna changte an chawimawi ṭhin. Perfume ang hi a ni a, chak chuan kan rim tui a, chak loh erawh chuan kan rim chhe thung," tiin result chauhin ngaih pawimawh a hlawh thu a sawi. 

Tun dinhmunah Man City result a ṭha lo a, an la ṭha tawk lo tih a chiang bawk. Chutihrualin an insiamṭhat ran loh chuan an elpui club-te umphak an har ṭalh ang.