I League club thar Sudeva

India rama club football inelna sang I League club thar ni turin Sudeva FC chu puan an ni a, Delhi-a hmunpui nei club hian season thar aṭangin Aizawl FC telna inelna hi an hmachhawn ang. 

All India Football Federation (AIFF) hnuaia Bid Evaluation Committee chu nimin khan video conference hmangin an inrawn khawm a, season thara I League khelh dil - Sudeva (Delhi), Sreenidhi (Visakhapatnam) leh Ryntih (Shillong) aṭangin Sudeva dilna hi pawm a ni ta a ni. 

AIFF Bid Committee-ah hian I League Committee chairman Subrata Datta, deputy chairman Lalnghinglova Hmar, ISL enkawltu FSDL aiawh Chirag Tanna, AIFF treasurer ZA Thakur bakah AIFF office aṭangin general secretary Kushal Das leh I League CEO Sunando Dhar-te an tel.

Sudeva-in season thara I League an khelh dawn tak avangin he inelnaa tel tur chu team 12 an tling ta tihna a ni a, Visakhapatnam-a hmunpui nei Sreenidhi hian 2021-22 season aṭangin an khel ve bawk ang. 

Football academy changtlung tak nena Delhi lama inkulh Sudeva hian Spain-ah fourth division club CD Olímpic de Xàtiva an nei bawk a, season thar bikah chuan an relegate thei lo ang - season khat chauh atan a ni thung. 

Asian Football Confederation-a senior consultant hlui leh Delhi-a football thuneitu sang ber Football Delhi president Dr. Shaji Prabhakaran chuan, "Delhi aṭanga I League khel tur club hmasa ber an ni a, Delhi khawpuiin I League club kan nei tur hi chanchin lawmawm a ni. 

"India rama football ṭhan zelna tur chuan khawpui berin hmasawn a mamawh a, Football Delhi pawhin Sudeva pui chungin theihtawp kan chhuah zel ang, " tiin Vanglaini a hrilh a ni.