Bengaluru an chesual nawn lo

Nilaini zan khan Sree Kanteerava Stadium-ah Bengaluru FC-in an mikhual DSK Shivajians chu 4-1 in an hneh a, Ashley Westwood-a hoten I League-a East Bengal hmahruaina chu ni khat hnu lekah an chhuhsak leh nghal. Inkhel dangah champion lai Mohun Bagan leh Mumbai FC te goal awm loin an inhnehtawk bawk.

Blues an ṭha

Bengaluru FC tan Mizo midfielder Beikhokhei Beingaichho-a'n tun season-a a vawi khatna atan starting eleven a chang a, Blues-in inkhel bul an ṭan ṭha bawk.

Sporting Clube de Goa laka chak lo hlim Bengaluru tan captain Sunil Chhetri-a'n minute 12 lekah freekick aṭangin a khung a, minute 32-naah Korean playmaker Kim Song Yong-a'n goal hnihna a khung leh bawk. Siaha midfielder Beikhokhei ball pet nalh tak DSK keeper Subrata Paul-a'n first half tawp hmain a dan sak bawk.

Second half ṭantirhah Bengaluru keeper Amrinder Singh a che ṭha a, Champhai keeper Lalthuammawia tan starting eleven chang turin thawhrim lehzual a ṭul dawn. Bengaluru-in second half-ah Shankar Sampingiraj leh Seminlen Doungel hmangin goal hnih dang an khung a, 4-0 in an chak.

Bagan an chelh

Cooperage Stadium-ah Mohun Bagan tan Jeje Lalpekhlua'n minute 90 chhung a khel a, amaherawhchu Kolkata club hian Chinese club Shandong Luneng laka goal ruk an chhuah hnuah ngai an la awh lo.

Mumbai FC-in inkhelh ṭan tirh lamah Eric Brown leh Sushil Singh te'n chance ṭha an hlah a, inkhelh pumpuia thlir chuan Mariners-in goal khungna chance an ngah zawk. Hnahthial tlangval Jeje-a freekick hlawhchhuah Sony Norde-a'n goal-ah a chantir thei lo a, hun tawp lamah Mizo striker pass hi tun season-a goal li khung tawh Cornell Glen-a'n goal zawnah a pet thei lo.

Mariners-in match nga khelhah point 11 an hmu a, Inrinni zan dar 7:05 hian league hmahruaitu Benga-luru nen Sree Kanteerava Stadium-ah an inkhel ang.